Astanadan lastaýshy kásiporyndardy kóshirý qajet - Jeńis Qasymbek
ASTANA. QazAqparat - Astana aglomeratsııasynyń ekologııalyq jaǵdaıyn jaqsartý úshin І-ІІ sanattaǵy lastaýshy kásiporyndardy qaladan kóshirý qajet.
Bul týraly búgin Úkimettiń selektorlyq rejimdegi otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.
Mıınstrdiń sózine qaraǵanda, Astana aglomeratsııasyn aýmaqtyq damytý josparyna sáıkes «Astana-Býrabaı» jasyl dálizin qurý jáne ony tabıǵı orman alqaptarymen biriktirip, biryńǵaı ekojúıeni qamtamasyz etý kózdelgen. Al qurylysy josparlanyp otyrǵan «Saryarqa» gaz qubyry esebinen eldi mekenderdi odan ári gazdandyrý Astana men 30-ǵa jýyq eldi mekendi kógildir otynmen qamtamasyz etýge, sol arqyly ekologııalyq jaǵdaıdy jaqsartýǵa múmkindik beredi.
«Budan basqa, aglomeratsııanyń ekologııalyq jaǵdaıyn jaqsartý úshin І-ІІ sanattaǵy lastaýshy kásiporyndardy Astanadan kóshirý usynylady. Tótenshe jaǵdaılardan qorǵaný úshin 7 órt deposyn, kóktemgi kezeńde sýdyń astynda qalýy múmkin ýchaskelerde sý tasqynyna qarsy bógetterdi, Tselınograd aýdanynyń Talapker aýylynda sýdan qutqarý stansasyn salý qajet», - dedi Jeńis Qasymbek.
Onyń aıtýynsha, atalǵan sharalar halyqty qorǵaýdy qamtamasyz ete otyryp, ekonomıkalyq zalaldyń tómendeýine yqpal etedi.
