Astanadan Qysqy Olımpıadaǵa qansha sportshy qatysady
ASTANA. KAZINFORM – 2026 jyly Italııada ótetin XXV qysqy Olımpıada oıyndaryna elordadan tórt sportshy qatysady. Bul týraly Astana qalasynyń dene shynyqtyrý jáne sport basqarmasy basshysynyń orynbasary Azamat Aǵzamov AKQ-da ótken baspasóz konferentsııasynda málimdedi.
Onyń aıtýynsha, Astana qalasynyń sportshylary tórt jyldyqtyń basty dodasyna josparly túrde daıyndalyp jatyr.
– 2026 jylǵy 6–22 aqpan aralyǵynda Italııanyń Mılan jáne Kortına-d’Ampetstso qalalarynda ótetin Qysqy Olımpıada oıyndaryna daıyndyq bekitilgen josparǵa sáıkes júrgizilip jatyr. Astana qalasynyń sportshylary ulttyq qurama sapynda joǵary nátıjeler kórsetýge nıetti, – dedi Azamat Aǵzamov.
Spıkerdiń málimetinshe, Olımpıada oıyndaryna álemniń 93 elinen 3 500-den astam sportshy qatysady dep josparlanyp otyr. Qazaqstan Respýblıkasynyń ulttyq quramasy atynan 36 sportshy el namysyn qorǵaıdy.
Astana qalasynan Qysqy Olımpıada oıyndaryna úsh sport túri boıynsha tórt sportshy joldama alǵan. Atap aıtqanda, short-trek, konkımen júgirý jáne mánerlep syrǵanaý sportynan elordalyq sportshylar baq synaıdy.
– Short-trek boıynsha Qazaqstan ulttyq quramasynyń jetekshi sportshylarynyń biri Abzal Ájiǵalıev 500 metr qashyqtyqta jáne aralas estafetada óner kórsetedi. Bul onyń Olımpıada oıyndaryna tórtinshi ret qatysýy. Áıelder arasyndaǵy jeke mánerlep syrǵanaýdan Sofııa Samodelkına Qazaqstan atynan synǵa túsedi. Al konkımen júgirý sport túrinen Elızaveta Golýbeva men Krıstına Sılaeva jarystarǵa qatysady, – dep qorytyndylady Azamat Aǵzamov.
Eske sala keteıik eki aptadan soń XXV qysqy Olımpıada bastalady. Ol 6-22 aqpan aralyǵynda Mılan men Kortına-d’Ampetstsoda ótedi.