Astanadan qys bastalǵaly 5,5 mln tekshe metr qar shyǵaryldy

ASTANA. KAZINFORM – Astananyń kommýnaldyq qyzmeti kúsheıtilgen rejımde táýlik boıy jumys istep jatyr. Kún saıyn qar kúreý jumysyna myńdaǵan arnaıy tehnıka men jol jumysshysy jumyldyrylady, dep habarlaıdy qala ákimdiginiń resmı saıty.

Ótken túni elordadan qar polıgondaryna 2 008 aýyr júk kóliginiń reısimen 31 myń tekshe metrden astam qar men muz shyǵaryldy.

20 aqpan kúni tańerteńnen bastap qaladaǵy qar men kóktaıǵaqty tazartýǵa 1 568 arnaıy tehnıka jáne 3 039 jol jumysshysy jumyldyryldy. Eń aldymen negizgi kósheler men qoǵamdyq kólik júretin baǵyttar tazartylady. Odan keıin qozǵalys qarqyny ortasha aýmaqtarda – aýlalarda, alańdarda, trotýarlar men aıaldamalarda tazalaý jumysy júrgiziledi.

Jalpy, qys mezgili bastalǵaly beri qaladan qar polıgondaryna 373 751 reıspen 5,5 mln tekshe metrden asa qar shyǵarylǵan.

Qala turǵyndarynyń qaýipsiz qozǵalysyn qamtamasyz etý úshin joldar, trotýarlar men kóshelerge tehnıkalyq tuz sebilýde. Bul jumystar da táýlik boıy atqarylyp jatyr.

Astana qalasynyń ákimdigi qala turǵyndary men qonaqtaryn qaýipsizdik erejelerin saqtaýǵa, joldar men trotýarlarda barynsha saq bolýǵa, sondaı-aq qolaısyz aýa raıy jaǵdaıynda alys jolǵa shyqpaýǵa shaqyrady.

Buǵan deıin sınoptıkter 20 aqpan kúni aýa raıyna baılanysty el aýmaǵynda eskertý jarııalaǵanyn jazǵan edik.