Astanadan eki kúnde 3000 tekshe metrden astam qar arnaıy polıgondarǵa shyǵaryldy

ASTANA. KAZINFORM —  Kommýnaldyq qyzmet mamandary Astanadan sońǵy eki kún ishinde arnaıy polıgondarǵa 3000 tekshe metrden astam qar shyǵardy, dep habarlaıdy qala ákimdiginiń resmı saıty.

5 qarashada kúndizgi ýaqytta Astanadan 1229 tekshe metr qar shyǵaryldy. Bul shamamen 97 júk kóliginiń kólemine teń.

Qalanyń kommýnaldyq qyzmetteri jumysyn kúsheıtilgen ári úzdiksiz rejımde júrgizip jatyr.

Al 6 qarashaǵa qaraǵan túni qar kúreý jumysyna 187 jol jumysshysy men 433 arnaıy tehnıka jumyldyrylady.

Eń aldymen negizgi kóshe magıstraldary men qoǵamdyq kólik baǵyttary tazartylady.

Osydan keıin tazalaý jumysy qozǵalys qarqyny ortasha ýchaskelerde — aýlalarda, alańdarda, trotýarlar men aıaldamalarda júrgiziledi.

Astana ákimdigi qala turǵyndary men qonaqtaryn qaýipsizdik erejelerin saqtaýǵa, joldar men jaıaý júrginshi joldarynda meılinshe saq bolýǵa, sondaı-aq aýa raıy qolaısyz jaǵdaıda alys jolǵa shyqpaýǵa shaqyrady. 

Aıta ketelik astanada kommýnaldyq qyzmetter kúsheıtilgen jumys rejımine kóshkeni týraly jazǵan edik.