Astanadan Býrabaıǵa jańa týrıstik poıyz qatynaıdy

ASTANA. KAZINFORM — 13 jeltoqsanda Astanany elimizdiń eń tanymal kýrorttarynyń biri — Býrabaımen baılanystyratyn jańa brendtelgen poıyz saltanatty túrde iske qosylady, dep habarlaıdy elorda ákimdiginiń resmı saıty.

Jańa týrıstik poıyz — Astana, Aqmola oblysy ákimdikteriniń jáne «Jolaýshylar tasymaly» AQ birlesken jobasy.

Poıyzǵa qazaqstandyq ZIKSTO zaýytynda shyǵarylǵan vagondar kiredi, bul jergilikti mashına jasaýdyń joǵary deńgeıin kórsetedi. Vagondar yńǵaıly saıahatqa qajetti dúnıemen jabdyqtalǵan: zamanaýı kondıtsıoner júıesi, lıft jáne múmkindigi shekteýli jandarǵa arnalǵan oryndar, sondaı-aq qorshaǵan ortaǵa az áser etetin ekologııalyq taza dárethana.

— Poıyz Nurly Jol (Astana) stantsııalary men Býrabaı kýrorty arasynda toqtaýsyz júretin bolady. Jol júrý ýaqyty 2 saǵat 26 mınýtty quraıdy. Bılet quny: Nurly Jol stantsııasynan — 2770 teńge, Astana stantsııasynan — 2548 teńge, — delingen habarlamada

Poıyzdy iske qosý úshin vagondardyń biregeı dızaıny jasaldy. Syrtqy bezendirýge Báıterek, Qazaq eli monýmenti, Nur-Álem murajaıy jáne Şýche-Býrabaı kýrorttyq aımaǵynyń kórkem peızajdary sııaqty Astana men Býrabaıdyń kórnekti jerleriniń beıneleri kiredi.

Sondaı-aq, vagondarda Visit Astana jáne Visit Aqmola óńirleriniń týrıstik brendteri ornalastyrylǵan. Vagondardyń ishki bezendirilýi Astana qalasynyń mádenı erekshelikterin jáne kýrorttyń tabıǵı sulýlyǵyn kórsetedi.

Poıyzdyń taǵy bir ereksheligi — eksklıýzıvti aýdıo týr. Sapar barysynda jolaýshylar Astana men Býrabaıdyń tarıhy, mádenıeti men tabıǵı baılyǵy týraly qyzyqty faktilerdi bile alady. Bul sapardy jaıly ǵana emes, sonymen qatar tanymdyq etedi.

Bul joba ishki týrızmdi damytýǵa baǵyttalǵan.

Osyǵan deıin týrıster Býrabaı tabıǵatyn tikushaqpen tamashalaı alatyny habarlandy.