Astanadan Býrabaıǵa reıs ashyla ma – Mınıstrlik jaýaby

ASTANA. KAZINFORM – Kólik vıtse-mınıstri Maqsat Qalıaqparov Úkimettegi brıfıngte Astana men Býrabaı arasynda áýe reısi ashyla ma degen suraqqa jaýap berdi.

Buǵan deıin Aqmola oblysynyń ákimi Marat Ahmetjanov Astanamen tikeleı qatynas ornatý úshin shaǵyn áýejaı ashý máselesi pysyqtalyp jatqanyn aıtqan edi. 

– Astana men Býrabaıdy áýe baǵytymen qamtý jumysy júrgizilip jatqan joq. Biraq jalpy alǵanda mınıstrliktiń aldynda shaǵyn avıatsııany damytý mindeti tur. Qazir osy baǵyt boıynsha jan-jaqty zertteý júrgizip jatyrmyz. Shaǵyn avıatsııany damytý tujyrymdamasy daıyndalǵan soń, ony mindetti túrde BAQ qaraýyna usynamyz, – dedi Kólik vıtse-mınıstri. 

Spıkerdiń aıtýynsha, qazir de shaǵyn ushaqtary bar jeke áýe tasymaldaýshylary bar. Bul jerde ákimdik óz tarapynan bastama kóterip, qajetti qarjy bólip, áýe qatynasyn qamtamasyz ete alady.

– Býrabaı baǵytyna týrıstik aǵymnyń óte joǵary ekenin bilesizder – onda jylyna bir mıllıonnan astam adam keledi. Mundaı reısterdiń ashylýy ábden múmkin dep sanaımyz. Shaǵyn áýe reısterin iske qosý týrıstik baǵyttyń damýyna qosymsha serpin beredi, óıtkeni Astanaǵa ushyp kelip, Býrabaıǵa bet alatyn adamdar bar jáne olar óz jolyn tańdaýǵa quqyly. Bul jerde biz eshqandaı shekteý kórip turǵan joqpyz, – dedi M. Qalıaqparov.

Buǵan deıin Kólik vıtse-mınıstri Qazaqstanda 50-den astam jol ýchaskesi qaýipti dep tanylǵanyn aıtqan edi.