Astanadan Býrabaı men Qaraǵandy baǵytyna jańa elektr poıyzdary qatynamaq
ASTANA. QazAqparat - 25 sáýirden bastap Astana men Qaraǵandydan «Astana-Býrabaı kýrorty» jáne «Astana-Qaraǵandy» baǵytynda ED9E (energııaúnemdegish) serııasyndaǵy «Oqjetpes» jáne «Saryarqa» jańa elektr poıyzdary qatynaıtyn bolady.
Jańa poıyzdar yńǵaılylyǵymen jáne qaýipsizdigimen erekshelenedi. Bul týraly «Jolaýshylar tasymaly» AQ baspasóz qyzmetinen habarlady, dep jazady elorda ákimdiginiń resmı saıtynda. Kompanııanyń málimetinshe, bul elektr poıyzdary álemdik standarttarǵa saı, barlyq konstrýktıvtik sheshimder ónerkásiptik estetıka men óńdeýdegi sońǵy úrdisterdi eskere otyryp jasalǵan. «Oqjetpes» poıyzy Astanadan Býrabaı kýrortyna deıin juma kúnderi saǵat 18.50-de attanady, Býrabaıǵa saǵat 22.00-de jetedi. Al Býrabaıdan saǵat 22.35-te shyǵyp, Astanaǵa saǵat 01.40-ta keledi. Poıyz Astanadan Kókshetaý stansasyna deıin senbi, jeksenbi, dúısenbi jáne seısenbi kúnderi júredi. Astanadan saǵat 07.25-te shyǵady, Kókshetaý stantsııasyna saǵat 11.32-te jetedi. Kókshetaý stantsııasynan saǵat 19.00-te shyǵyp, Astanaǵa saǵat 23.07-de jetedi», dep habarlady baspasóz qyzmetinen. Aıta keteıik, atalmysh poıyzdaǵy jolaqy quny - І sanattaǵy vagonda - 1 088 teńge, ІІ sanattaǵy vagonda - 1 013 teńge, ІІІ sanattaǵy vagonda - 842 teńgeni quraıdy.
