Astanadan bir túnde 70 myń tekshe metrge jýyq qar shyǵaryldy
ASTANA. KAZINFORM – Elordada qardyń kóp jaýýy men aýa raıynyń kúrt sýytýyna baılanysty qalanyń kommýnaldyq qyzmetteri táýlik boıy jumys istep jatyr, dep habarlaıdy qala ákimdiginiń resmı saıty.
Ótken túnde qala aýmaǵynan arnaıy polıgondarǵa 4 502 aýyr júk kóliginiń qatysýymen shamamen 70 myń tekshe metr qar shyǵaryldy. 14 qańtar kúni tańerteńnen bastap qar tazalaý jumystaryna 3 myńnan astam jol jumysshysy men 1 900-ge jýyq arnaıy tehnıka jumyldyryldy.
Qys maýsymy bastalǵannan beri jalpy kólemi 2,4 mıllıon tekshe metrden astam qar 187 120 reıspen tasymaldanǵan.
Aldymen negizgi kósheler men qoǵamdyq kólik baǵyttary tazalanyp, keıin ortasha qozǵalysy bar aýmaqtar – aýlalar, alańdar, trotýarlar men aıaldamalar tazalaý jumystaryna beriledi.
Qala turǵyndarynyń qaýipsizdigin qamtamasyz etý maqsatynda joldar men trotýarlarǵa tehnıkalyq tuz sebilip jatyr. Bul jumystar da úzdiksiz júrgizilip keledi.
Aýmaqtyq tazalyqty qamtamasyz etý mindeti páter ıeleri kooperatıvteri (PIK) men múlik ıeleri birlestikterine (MIB) júktelgen. Olar aýlalardy qar men kóktaıǵaqtan ýaqtyly tazalap, turǵyndardyń qaýipsizdigi men jaılylyǵyn qamtamasyz etýi tıis.
Astana ákimdigi qala turǵyndary men qonaqtaryn qaýipsizdik erejelerin qatań saqtaýǵa, joldar men trotýarlarda abaı bolýǵa jáne qolaısyz aýa raıy kezinde uzaq saparǵa shyqpaýǵa shaqyrady.
Eske sala keteıik, budan buryn aldaǵy kúnderi elimizde -40°S-qa deıin aıaz bolatynyn habarlaǵanbyz.
