Astanadan bir túnde 2,3 myńǵa jýyq júk kóligimen qar shyǵaryldy

ASTANA. KAZINFORM – Elordada birneshe kúnnen beri toqtaýsyz qar jaýdy. Qys mezgiliniń basynan bastap qalanyń kommýnaldyq qyzmetteri kúsheıtilgen jumys rejımine kóshti. Kún saıyn 2,5 myńǵa jýyq jol jumysshy qar tazalaýǵa shyǵady, dep habarlaıdy elorda ákimdiginiń resmı saıty.

14 qarasha kúni kúndizgi aýysymda Astana kóshelerin qar men muzdan 2,5 myńnan astam jol jumysshy men 1,4 myń birlik arnaıy tehnıka tazartady.

14 qarashaǵa qaraǵan túni elordadan 30 myń tekshe metrden astam qar shyǵaryldy, bul shamamen 2,3 myń aýyr júk kóligin quraıdy.

Qys mezgiliniń basynan bastap qar polıgondaryna 17 095 reıspen 210 myń tekshe metrden astam qar shyǵaryldy.

Eń aldymen, ereje boıynsha, joldarda keptelis bolmas úshin qozǵalysy óte qarqyndy tustar tazartylady. Sondaı-aq ortasha qarqyndylyǵy bar ýchaskeler – alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t.b. qardan tazartylady.

Sol sııaqty ortalyq kóshelerdi, jolaýshylar kóligi marshrýttary, aıaldamalar men trotýarlar joldaryn tazalaýǵa basymdyq beriledi.

Qalada birneshe jabdyqtalǵan qar polıgony bar. Olar samosval tehnıkasynyń nómirlik belgilerin oqý júıesimen jabdyqtalǵan, sol sııaqty munda beınebaqylaý kameralary ornatylyp, jaryqtandyrý qosylǵan.

«Qazgıdromet» RMK derekteri boıynsha, 14 qarashada Astanada kóshpeli bult shyǵyp, qar jaýyp, jel soǵady – jyldamdyǵy 9-14 m/s, ekpini 15-18 m/s deıin bolady dep kútilip otyr.