Astanadan Beıjińge endi aptasyna 6 ret ushýǵa bolady
ASTANA.KAZINFORM — Tamyz aıynyń basynan bastap Air China áýe kompanııasy Astana halyqaralyq áýejaıynan Beıjińge oryndalatyn reıster sanyn aptasyna alty retke deıin arttyrdy. Bul týraly Nursultan Nazarbaev halyqaralyq áýejaıy málim etti.
Onyń úsheýi Astana – Beıjiń baǵyty boıynsha tikeleı, taǵy úsheýi Astana – Sıan – Beıjiń baǵyty boıynsha oryndalady.
Reıs jıiliginiń artýy elorda turǵyndary men qonaqtaryna Qytaıǵa saparyn josparlaýda qosymsha múmkindik beredi. Endi jolaýshylar óz josparyna qaraı Astanadan Beıjińge tikeleı ushýdy nemese Sıan arqyly qatynaıtyn reısti tańdaı alady. Sondaı-aq reıster sanynyń kóbeıýi týrıstik jáne iskerlik saparlar úshin qolaıly ushý kúnin tańdaýǵa múmkindik beredi.
— Air China áýe kompanııasynyń ushý baǵdarlamasyn keńeıtýi Qazaqstan men Qytaı arasyndaǵy áýe qatynasyn damytý baǵytyndaǵy júıeli jumystyń jalǵasy. Astana halyqaralyq áýejaıy úshin qytaılyq áýe tasymaldaýshylarmen yntymaqtastyqty keńeıtý halyqaralyq marshrýttyq jelini damytýdyń mańyzdy baǵyttarynyń biri bolyp qala beredi, — delingen habarlamada.
Air China áýe kompanııasynyń jańa kestesi jolaýshylarǵa saparlaryn josparlaýda kóbirek múmkindik berip, Qazaqstan men Qytaı arasyndaǵy týrıstik, ekonomıkalyq jáne iskerlik baılanystardyń odan ári nyǵaıýyna yqpal etedi.
Air China reısteriniń kestesi:
Astana – Sıan – Beıjiń: dúısenbi, sársenbi, juma.
Astana – Beıjiń: seısenbi, beısenbi, senbi.
Air China – Qytaıdyń ulttyq áýe tasymaldaýshysy ári eldegi eń iri áýe kompanııalarynyń biri. Áýe kompanııasynyń negizgi haby – Beıjiń qalasy. Marshrýttyq jelisi Qytaıdyń, Azııanyń, Eýropanyń jáne álemniń ózge de óńirleriniń iri qalalaryn qamtıdy. Air China halyqaralyq Star Alliance avıatsııalyq alıansynyń múshesi. Áýe kompanııasy men onyń enshiles tasymaldaýshylarynyń áýe parki 960-tan astam áýe kemesinen turady. 2025 jyly Air China toby shamamen 160 mln jolaýshy tasymaldady.
Eske sala keteıik, buǵan deıin Qazaqstan men Qytaı arasynda jańa áýe baǵyttary ashylýy múmkin ekenin jazdyq.
