Astanadan Batys Qazaqstan oblysyna gýmanıtarlyq kómek jiberildi
ASTANA. KAZINFORM – Astanadan sý tasqynynan zardap shekken óńirlerge 1 myń tonnaǵa jýyq gýmanıtarlyq kómek jiberildi. «AMANAT» partııasy Astana qalalyq fılıalynan Batys Qazaqstan oblysyna 20 tonnadan astam kezekti gýmanıtarlyq kómek jóneltildi. Bul týraly elorda ákimdiginiń resmı saıty jazdy.
«Tabıǵı apattan zardap shekken azamattarǵa «AMANAT» partııasynyń ár oblystaǵy fılıaly óziniń shama-sharqynsha kómektesip jatyr. Májilis depýtattary, partııanyń beldi azamattary, «Jastar rýhy» jastar qanatynyń qyz-jigitteri el arasynda júr. Árqaısysy óz deńgeıinde tıisti sharalardy qabyldap, azamattardyń ıyǵyna túsken aýyrpalyqty qatar eńserip keledi», - deıdi «AMANAT» partııasy Astana qalalyq fılıalynyń atqarýshy hatshysy Muhammed Bolysbek.
Júk kóligine turmystyq jáne gıgıenalyq zattar, motorly qaıyq, qap, kúrek, sý, etik jáne taǵy basqa qajet zattar tıeldi. Gýmanıtarlyq kómek jınaý jalǵasyp jatyr. Buǵan deıin partııanyń elordalyq fılıaly qala ákimdigimen, máslıhat depýtattarymen, Bastaýysh partııa uıymdarymen, shaǵyn, orta jáne iri kásip ókilderimen birlesip Qostanaı, Batys Qazaqstan, Aqtóbe oblystaryna gýmanıtarlyq kómek jibergenin esterińizge sala keteıik.
Sonymen qatar elordalyq Qazaqstan halqy Assambleıasy Dostyq úıiniń bazasynda sý tasqynynan zardap shekken óńirlerdiń turǵyndary úshin gýmanıtarlyq kómek jınaý boıynsha áleýmettik aktsııa uıymdastyrdy. Kómek Aqmola jáne Qaraǵandy oblystarynyń turǵyndaryna jetkizildi. Zardap shekkenderge kıim, tamaq, gıgıena quraldary, tósek-oryn, ydys-aıaq jáne dári-dármekter jınaldy.
Esterińizge sala keteıik, elordada gýmanıtarlyq kómekti qabyldaıtyn 9 pýnkt jumys isteıdi. Jıynǵa 30-ǵa jýyq eriktiler uıymy qatysady.
Kún saıyn 200-den astam erikti qajetti zattardy suryptap jiberedi. Jınalǵan kómektiń ishinde kıim, azyq-túlik, gıgıena quraldary men aıaq kıim basty oryn alady.
Eriktiler qarjylyq kómekti qabyldamaıdy. Nıet bildirýshiler jınaý oryndaryna qajetti zattardy jınap, ákele alady.
