Astanadan barlyq baǵyttar boıynsha shyǵý joldary jáne Qazaqstannyń 6 oblysyndaǵy joldar jabyldy
ASTANA. 14 jeltoqsan. QazAqparat - Aýa raıy jaǵdaıynyń nasharlaýyna baılanysty (temperatýranyń kúrt tómendeýi) saǵat 17.30-dan bastap Astana qalasynan shyǵý joldarynyń barlyq baǵyttary avtokóliktiń barlyq túrleri úshin jabyldy. Bul týraly QR TJM baspasóz qyzmeti habarlaıdy.
Almaty oblysy boıynsha saǵat 17:00-den beri aýa temperatýrasynyń kúrt tómendeýine baılanysty "Almaty-Óskemen" avtojolynyń 558-615 shaqyrymyndaǵy "Rýbej beketi- Shyǵys Qazaqstan oblysy shekarasy" aralyǵynda qoǵamdyq jáne dızel otynymen júretin avtokóliktiń qozǵalysyna tyıym salyndy.
Saǵat 18:00-den bastap aýa temperatýrasynyń kúrt tómendeýine baılanysty Aqmola oblysy boıynsha barlyq baǵyttarda qoǵamdyq, júk jáne dızel avtokóliginiń qozǵalysyna shekteý engizilgen bolatyn.
Budan bólek, saǵat 17:00-den bastap Shyǵys Qazaqstan oblysy boıynsha barlyq baǵyttarda qoǵamdyq jáne dızel otynymen júretin avtokólikter úshin jol jabyldy.
Sonymen qatar búgin keshqurym Qaraǵandy oblysy boıynsha barlyq baǵyttarda qoǵamdyq, júk jáne dızel otynymen júretin avtokólikterdiń qozǵalysyna shekteý engizildi.
16:30-dan bastap aýa temperatýrasynyń kúrt tómendeýine baılanysty Pavlodar oblysy boıynsha barlyq baǵyttarda avtokóliktiń barlyq túrlerine jolǵa shyǵýǵa tyıym salyndy.
Saǵat 17:00-den bastap aýa temperatýrasynyń kúrt tómendeýine baılanysty Soltústik Qazaqstan oblysy boıynsha barlyq baǵyttarda qoǵamdyq jáne dızel otynymen júretin avtokólikter úshin jol jabyldy.
