Astanadan «Altyn tulpar» alaman báıgesine kórermenderdi aparatyn tegin avtobýstar uıymdastyrylady
ASTANA. QazAqparat - Budan buryn habarlanǵandaı, erteń 14 qyrkúıek kúni Astanadan 30 shaqyrym qashyqtyqta ornalasqan Qabanbaı batyr aýylynda respýblıkalyq «Altyn tulpar» alaman báıgesi ótpek. Oǵan Qazaqstannyń barlyq oblystarynyń shabandozdary qatysady.
Bul dúbirldi dodany kórýge yntyq kórermenderge Astana qalasynan tegin avtobýstar júrgizý uıymdastyrylǵan, dep habarlaıdy QR Ulttyq sport túrleri qaýymdastyǵynan. Olar úshin «Asia Park» oıyn-saýyq ortalyǵynan tańǵy saǵat 10.00-de avtobýstar jolǵa shyǵady. Al BAQ ókilderine arnalǵan avtobýs ta «Qazmedıa» ortalyǵynyń aldynan saǵat 10.00-de júredi.
Týrnırdiń baǵdarlamasy boıynsha saǵat 11.00-de «Altyn tulpar» alaman báıgesiniń saltanatty ashylýy ótedi. Al báıgeniń ózi shamamen saǵat 11.10-da bastalady. Túski saǵat 14.00-de dodanyń saltanatty jabylýy jáne jeńimpazdardy marapattaý rásimi ótpek.
