Astanadan Almatyǵa ekinshi dúnıejúzilik soǵys batyrlarynyń sýretimen bezendirilgen poıyz attandy
ASTANA. KAZINFORM – Astana-Almaty baǵytyna erekshe bezendirilgen júrdek poıyz attandy. «Jolaýshylar tasymaly» mekemesi «Nurly jol» vokzalynan keshki saǵat 20.20-da jolǵa shyǵatyn poıyzdyń eki vagonyna ekinshi dúnıejúzilik soǵystyń qazaqtan shyqqan batyrlarynyń sýretterin qondyrypty.
Perron aýmaǵy yǵy-jyǵy. Bıletine bir, aldynan shyqqan vagon nómirine eki qarap, arly-berli sabylǵan qalyń jolaýshy. Bir-birine irkes-tirkes turǵan restoran-vagon men bar-vagonnyń syrtyndaǵy 1945-2025 degen qanyq tústi úlken jazýdy kórgende sál baıaýlap baryp, júrisin qaıta údetedi. Keıbiri asyǵystyǵyna qaramastan Baýyrjan Momyshuly men Raqymjan Qoshqarbaevtyń, Álııa Moldaǵulova men Mánshúk Mámetovanyń, Talǵat Bıgeldınovtiń sýretine bir sátke aıaldap, uıaly telefondaryna túsirip alyp jatyr.
«Jolaýshylar tasymaly» aktsıonerlik qoǵamy óz jolaýshylaryn jeńistiń 80 jyldyǵymen quttyqtap, beıbit kúnniń qadirin dáripteý úshin osyndaı amal oılap tapqan eken.
- Biz ulttyq tasymaldaýshy bolǵandyqtan jolaýshylardy Qazaqstan halqy úshin mańyzdy sanalatyn meıramdarmen quttyqtaý úshin túrli kreatıvti qamdarǵa baryp jatamyz. Bul joly jyldaǵy dástúr boıynsha Astana-Almaty baǵytyndaǵy №3\4 poıyzyn ekinshi dúnıejúzilik soǵysta erlik kórsetken qazaq batyrlarynyń sýretimen bezendirdik. Munyń aldynda Astana-Atbasar baǵytyndaǵy elektrli poıyzdy da osylaı bezendirip attandyrdyq. Jalpy ulttyq jáne memlekettik meıramdardyń bárine arnap osyndaı sharalar uıymdastyryp turamyz. Jeńis merekesi sondaı aıtýly kúnderdiń biri biz úshin, - deıdi «Jolaýshylar tasymaly» AQ baspasóz hatshysy Narıman Dúısekeev.
Poıyz bastyǵy Beksultan Baýbek erekshe bezendirilgen vagondar jolaýshylarǵa unaǵanyn aıtady.
- Ózderińiz de baıqadyńyzdar ma, bilmeımin. Perronǵa poıyz kelip toqtaǵan sátte batyrlardyń sýretin artqy fonǵa alyp selfı jasaýshylar kóp bolǵan. Bul da bolsa uzaq jolǵa shyǵyp bara jatqan jolaýshylardyń kóńilin bir serpiltip tastaıtyn jaǵymdy dúnıe ǵoı. Ózi Jambyl oblysynyń týmasy bolǵandyqtan Baýyrjan atamyzdyń sýretiniń janynda fotoǵa túsip aldym, - deıdi ol.
Jolaýshylardyń biri Almatyda erteń ótetin sherýge daıyndalyp shyqsa kerek. Bir qolynda dóńgelekti shabadan, ekinshi qolynda naǵashysynyń sýreti.
Aıtýynsha, týǵan jylyn ulǵaıtyp kórsetip, soǵysqa attanǵan 16 jasar Qabıbolla Ysqaqov Ýkraına maıdanynda rota komandıri bolyp júrgen jerinen oqqa ushqan.
Osylaısha budan 80-84 jyl buryn ásker tıegen eshelondarmen ekinshi dúnıejúzilik soǵysqa attanǵan bozdaqtar men ardager batyrlardyń sýreti beıbit eldiń dalasyn poıyzben aralaýǵa shyqty.
Buǵan deıin Jetinshi arna ardagerlerge degen qurmet pen alǵystyń belgisi retinde «Batyrlarǵa taǵzym» atty keń aýqymdy jobany iske qosqanyn habarlaǵan edik.
