Astanadan Alakólge tikeleı poıyz júredi

ASTANA. KAZINFORM – Elimizde tanymal týrıstik aımaqtardyń biri – Alakólge endi týrıster elorda jáne basqa da óńirlerden tikeleı poıyzben jete alady. Bul týraly «Jolaýshylar tasymaly» AQ basqarma basshysy Jánibek Taıjanov málim etti. 

«Temirjol – elimizdiń týrızm salasyn damytýda erekshe ról atqarady. Bıyl Alakólge Astana, Almaty, Shyǵys Qazaqstan jáne Abaı oblysynan tikeleı poıyz qatynaı bastaıdy. Sondaı-aq, alǵash ret Qyzylordadan 12 baǵyt boıynsha poıyzdardy iske qosqaly otyrmyz. Onyń ishinde 10 baǵyt boıynsha «Jolaýshylar tasymaly» AQ poıyzdary jáne eki baǵytqa jeke tasymaldaýshylardyń poıyzy júredi», - dedi Jánibek Taıjanov vedomstvoda ótken brıfıngide.

Onyń aıtýynsha, poıyzdardyń sany ótken jylmen salystyrǵanda 16 myńǵa artqan. Jazǵy maýsymda jolaýshylardyń yńǵaılylyǵy úshin 270 myń vagon ornymen qamtymaq.

«Ulttyq tasymaldaýshy óz poıyzdaryn aýany baptaý júıesimen jabdyqtaıdy», - dep sendirdi basqarma basshysy.

«Jolaýshylar tasymaly» AQ-nyń bıyl iske qosylatyn baǵyttary:
– № 254/253 «Astana-Dostyq»;
- №207/208, №221/222, №211/212 «Almaty-2-Dostyq»;
- №457/458 «Semeı-Dostyq»;
- №459/460 «Óskemen-Dostyq»;
- №21/22, № 6942/6941 «Almaty-Dostyq»;
- №21/22, №6942/6941 «Qyzylorda-Dostyq».

Jeke tasymaldaýshylardyń marshrýttary:

- №337/338 «Almaty-2-Dostyq» - «Vagon Service Alliance» JShS;
- №122/121, №6942/6941 «Astana-Dostyq» - «AraıTrans KZ» JShS.

«Alakól baǵytyndaǵy poıyzdar týrıster arasynda tanymal Jalańashkól, Aqshı jáne Beskól stantsııalarynda toqtaıdy. Onda jolaýshylardyń jaılylyǵy men qaýipsizdigin qamtamasyz etý úshin qajetti jaǵdaılar jasalǵan. Atap aıtqanda, perrondar ulǵaıtyldy, kútý zaldary men kassalar jóndeldi. Jolaýshylarǵa yńǵaıly bolý úshin stantsııalarda kassırlerdiń aýysymdyq jumysy uıymdastyryldy», - dedi J. Taıjanov.