Astanadan Abaı oblysyna sıntetıkalyq esirtki jetkizgen kúdikti ustaldy
ASTANA. KAZINFORM — Abaı oblysynda Astana qalasynan júıeli túrde esirtki jetkizip, taratýmen aınalysqan azamat ustaldy. Abaı oblysy prokýratýrasynyń úılestirýimen Ulttyq qaýipsizdik komıteti departamentiniń qyzmetkerleri sıntetıkalyq esirtki jetkizýdiń turaqty arnasynyń zańsyz qyzmetin toqtatty.
Anyqtalǵandaı, Semeı qalasynyń turǵyny sıntetıkalyq esirtkilerdi Astana qalasynan júıeli túrde jetkizip, olardy oblys aýmaǵynda odan ári taratýmen aınalysqan.
Sotqa deıingi tergep-tekserý sheńberinde kúdikti ustalyp, ýaqytsha ustaý ızolıatoryna qamaldy.
— Jedel-tergeý is-sharalary barysynda zańsyz aınalymnan jalpy quny 50 mln teńgeden asatyn 2 keliden astam sıntetıkalyq esirtki tárkilendi. Tárkilengen esirtki kólemi qoldanystaǵy zańnamaǵa sáıkes asa iri mólsherge jatady, — delingen habarlamada.
Qazirgi ýaqytta qylmystyq quqyq buzýshylyqtyń barlyq mán-jaıyn, sondaı-aq oǵan qatysy bar ózge de tulǵalardy anyqtaýǵa baǵyttalǵan qajetti tergeý áreketteri júrgizilip jatyr.
Abaı oblysynyń prokýratýrasy esirtki quraldarynyń, psıhotroptyq zattardyń, olardyń analogtary men prekýrsorlarynyń zańsyz aınalymyna baılanysty saqtaý, tasymaldaý, daıyndaý, óńdeý, jóneltý, ótkizý jáne ózge de zańsyz áreketter Qazaqstan Respýblıkasynyń zańnamasyna sáıkes qylmystyq jaýaptylyqqa ákep soǵatynyn eskertedi.
Esirtki quqyq buzýshylyqtaryn anyqtaý, jolyn kesý jáne olardyń aldyn alý jumystary prokýratýra organdarynyń erekshe baqylaýynda.
Eske sala keteıik, buǵan deıin Jetisý oblysynda esirtki ótkizýmen aınalysqan uıymdasqan toptyń qyzmeti toqtatylǵan bolatyn.
