Astanadan 3 tonna qoqys shyǵaryldy
ASTANA. QazAqparat - Astanada «Dúnıejúzilik tazalyq kúni» halyqaralyq áleýmettik-ekologııalyq aktsııasy kúni 3,3 tonna qoqys jınaldy, dep habarlaıdy QazAqparat elorda ákimdigine silteme jasap.
Atap ótilgendeı, aktsııa 15 qyrkúıek kúni ótti. Elordany kúl-qoqystan tazartýǵa 5 myń adam qatysqan.
Sarybulaq ózeniniń jaǵasynan, № 14, № 37, № 73 mektepterdiń jáne «Nurly jol» vokzaly aýmaǵynan, Qorǵaljyn tasjolynan, N. Tilendıev kóshesinen jáne taǵy da basqa, barlyǵy 10 aýdannan 3,3 tonna qatty qoqys jınalǵan.
Bul aktsııanyń ereksheligi jınalǵan qoqys suryptalyp (qaıtalama shıkizat bólek, aralas qoqys bólek), «Kaz Recycle Service» JShS-niń qoqys óńdeıtin zaýytyna jiberildi.
Aıta keteıik, «Dúnıejúzilik tazalyq kúni» halyqaralyq áleýmettik-ekologııalyq aktsııasy jyl saıyn 15 qyrkúıek kúni ótedi. Oǵan álemniń 150-den astam eli qatysady. Aktsııa 2008 jyly Estonııa elinen bastaý alǵan, onda 50 myń erikti bes saǵattyń ishinde eldi 10 myń tonna qoqystan tazartqan.
Buǵan deıin habarlaǵanymyzdaı, 22 qyrkúıek kúni Astanada jalpyqalalyq senbilik ótedi.
Oǵan 2 myńnan astam kásiporyn men uıym, 46 joǵary oqý orny men orta kásiptik oqý mekemesi, 177 orta mektep men jalpy bilim beretin mekeme, 58 densaýlyq saqtaý mekemesi, 146 memlekettik mekeme men uıymdar jáne kásiporyndar, jalpy 72 myń adam qatysady dep kútilýde. Sondaı-aq 520 birlik mamandandyrylǵan tehnıka jumyldyrylmaq.
Budan bólek, 12 534 túp aǵash otyrǵyzylatyny josparlanǵan.
Astana qalasynda kúzgi abattandyrý, kógaldandyrý jáne sanıtarlyq tazalaý boıynsha ekologııalyq aılyq 10 qazanǵa deıin jalǵasady.
