Astanadaǵy jyly aıaldamalar kún men jelden qýat alady
ASTANA. QazAqparat - Astana qalalyq energetıka basqarmasy qala aýmaǵynda Wi-Fi qondyrǵylaryn ornatyp jatyr. Sol jerde uıaly telefondardy zarıadtaýǵa da bolady, dep xabarlaıdy QazAqparat tilshisi.
«Jalpy, qala boıynsha ondaı qondyrǵylardyń 18 túri ornatylady. Sonyń barlyǵy balamaly energııa kózderinen (kún men jelden) qýat alady. Mamyr aıynda Esildiń sol jaǵalaýyna jáne Prezıdent saıabaǵyna qoıylady. Biz atalǵan kásippen aınalysatyn kompanııalardy ózimiz izdep taptyq. Sol kezde shetelde ondaı apparattardyń qalaısha jumys istep turǵanyn da zerdelep shyqtyq», - deıdi basqarma qyzmetkeri Rýstam Qadyrov.
Onyń aıtýynsha, aldaǵy ýaqytta jyly aıaldamalar da osy ispetti júıeniń negizinde jumys isteıdi.
«Bylaısha aıtqanda, jyly aıaldamalar avtonomdy túrde qýat kózderimen qamtamasyz etiledi. Ol úshin fotoelektrlik elementter men jel generatorlary ornatylady. Osylaısha, qalalyq elektr jelilerge túsetin júkteme de azaıady», - dep atap kórsetti Qadyrov.
