Astanadaǵy jyly aıaldamalar qoldanysqa qashan beriledi
ASTANA. QazAqparat - Astanada jańa aıaldamalar salynǵanymen, halyq qoldanysyna áli berilmedi. Zamanǵa saı jańa pavılondar nelikten jumys istemeı turǵanyn qalalyq ákimdiktiń ókili aıtyp berdi, dep habarlaıdy QazAqparat tilshisi.
«Qazirgi tańda qurylys-montajdaý jumystary júrgizilip jatyr. Elektr toǵy áli tartylmaǵandyqtan, ol aıaldamalarda ázirge jylý joq. Dál qazir ony iske qosý týrasynda «Energosbyt» jáne AREK-pen kelisip jatyrmyz. Biz olarmen qajetti barlyq jumystardy júzege asyrǵannan keıin pavılondar ashylatyn bolady», - dedi QazAqparat tilshisine Astana qalasynyń Jolaýshylar kóligi basqarmasy jol júrý qaýipsizdigi bóliminiń basshysy Rýslan Ábdýálıev.
Ázirge ákimdik ókilderi qala turǵyndaryna shydamdylyq tanytyp, avtobýsty ashyq aıaldamalar shatyrynyń astynda kúte turýdy suraıdy.
«Dál qazir jel men borannan, jańbyrdan pavılondardyń shatyrynda qorǵanýǵa bolady. Biz kelisimniń barlyq protsedýralarynan ótip, aıdyń sońyna deıin pavılondardy iske qosqaly otyrmyz. Ol jerde jylýmen birge vıdeobaqylaý da bolady», - deıdi ol.
Rýslan Ábdýálıevtiń aıtýyna qaraǵanda, elektr toǵy qosylmaı turyp, aıaldama pavılondaryn iske qosýdyń paıdasy joq.
«Aıaldama pavılondaryn qazir ashyp tastasaq, báribir jylýdyń bolmaıtynyn eskerý kerek. Ol jerdegi temperatýra aıaldamanyń ashyq tusymen birdeı bolady. Aýa raıynyń qubylmalylyǵyna qaramastan, áli eki apta boıy kúnniń jyly bolatynyn adamdarǵa túsindirip jatyrmyz. Sýyq túskenge deıin biz jumysty tolyq aıaqtap, pavılondardy ashatyn bolamyz», - deıdi Rýslan Ábdýálıev.
