Astanadaǵy jumyssyzdyq resmı málimetterden úsh esege joǵary - qala ákiminiń orynbasary

ASTANA. QazAqparat - Astanadaǵy resmı emes jumyssyzdyq deńgeıi resmı kórsetkishterge qaraǵanda úsh ese joǵary. Bul týraly búgin jumyspen qamtý máselesi boıynsha Astana forýmynda qala ákiminiń orynbasary Aıda Balaeva málim etti.

«Búginde resmı emes jumyssyzdyq deńgeıi týraly aıtý qıyndaý. Alaıda, elordaǵa tán ómirlik qarqyn men tolassyz kóshi-qon aǵyny resmı emes jumyssyzdyq aýqymy resmı derektermen salystyrǵanda 2-3 ese artyq bolýy múmkin ekenin baıqatady», - dedi ol.

Onyń málimetterine qaraǵanda, qazirgi kezde Astanadaǵy jumyspen qamtý qyzmetterinde 24 myń jumyssyz resmı tirkelgen. Biraq ta, osyǵan qaramastan, respýblıka boıynsha elordalyq jumyssyzdyq kórsetkishi eń tómengilerdiń sanatynda.

«Qalalyq bıliktiń belsendi is-qımylynyń arqasynda bul kórsetkish sońǵy bes jyl qatarynan turaqty bolyp keledi. Ol úshin qala ákiminiń tapsyrmasymen shahardaǵy problemalardy sheshýge baǵyttalǵan is-qımyldardyń naqty algorıtmi júzege asyryldy. Olardyń barlyǵy úsh negizgi qujattyń maqsattaryna, ıaǵnı 2015 jylǵa deıin Astanany damytý baǵdarlamasyna, «Jumyspen qamtý-2020» memlekettik baǵdarlamasyna jáne 2013-2014 jyldary eńbek naryǵyn retteý boıynsha elordalyq ákimdiktiń jalpy qalalyq is-qımyly josparyna negizdelgen», - dedi A. Balaeva.

Nátıjesinde, jyl saıyn qalada 15 myń jańa jumys oryndary qurylýda. Olardyń basym bóligi áleýmettik sektorǵa tıesili.