Astanadaǵy JEO-3 qurylysyna aýdıt: Ákimdik derekteri sáıkes kelmeı tur
ASTANA. QazAqparat – Jylý energetıka salasynda ınvestıtsııalyq jobalar sapasyz iske asyrylyp jatyr. Bul týraly Májilistiń jalpy otyrysynda jylýmen jabdyqtaý salasyndaǵy aýdıtorlyq is-sharanyń qorytyndysyn talqylaý kezinde Joǵary aýdıtorlyq palata tóraǵasy Natalıa Godýnova aıtty, dep habarlaıdy QazAqparat tilshisi.
«Qarjylaı qamtamasyz etýdiń ózinde, ınfraqurylymdyq jobalardy iske asyrýda tejeýshi faktorlar kóbinese sapasyz jobalaý men merdigerlerdiń shart mindettemelerin tıisinshe oryndamaýyna qatysty bolyp tur. Máselen, Astana qalasyndaǵy bárine tanymal JEO-3 qurylysynyń jobasy 2011 jyldan beri iske asyrylyp keledi. Aýdıt jasaý kezinde jumystyń nebári 64 paıyzy oryndalǵany rastaldy, al ákimdik 83% iske asyrylǵanyn málimdegen edi. Sonymen qatar, osy ýaqyt ishinde joba 40 paıyzdan astam somaǵa qymbattaǵan», - dedi N. Godýnova.
Onyń aıtýynsha, qalada energııa berý nysandaryna qatysty jylý berý baǵytynda júkteme shamadan tys asyp ketken. 2021-2022 jyldary jylý jelilerine qosylý baǵytynda qalanyń energııa kózderi qýatynda tapshylyq bolǵan. Degenmen, «Astana-Teplotranzıt» AQ 730 zańdy jáne 360 jeke tulǵaǵa ortalyq jylý berý júıesine qosylýǵa tehnıkalyq sharttaryn bergen. Osynyń saldarynan 2023 jyly jylý berý júıesinde teńgerimsizdik baıqaldy.
«Osyǵan baılanysty ósip kele jatqan júktemeni eskere otyryp, qalalardyń turǵyn úı qurylysynda ınjenerlik ınfraqurylymnyń qoldanystaǵy qýatyn eskerý mańyzdy», - dedi palata basshysy.
Budan buryn habarlanǵandaı, Joǵary aýdıtorlyq palata jylymen jabdyqtaý salasynda qarajatty tıimsiz ıgerý derekterin anyqtady.
Jylý berý salasyndaǵy memlekettik retteý birneshe memlekettik organǵa júktelgendikten, jylý energetıkasyn damytýda júıeli tásil joq.
