Astanadaǵy jeńil relsti tramvaı jelisiniń nusqalary talqylanýda
ASTANA. QazAqparat - Astana qalasynyń ákimi Áset Iskeshev elordadaǵy jeńil relsti tramvaıdyń jaıy týraly aıtyp berdi, dep habarlaıdy QazAqparat tilshisi.
Shahar basshysynyń sózine qaraǵanda, qazirgi ýaqytta jeńil relsti tramvaıdyń baǵytyn qaı jaqta uzartý kerektigi týraly másele talqylanýda. Bir nusqa boıynsha, jelini Qabanbaı batyr dańǵyly boıynsha tike tartyp, odan ary Turan arqyly «Saryarqa» saýda ortalyǵy, «Kerýen-sıtı» jaqqa jeli jalǵasýy múmkin. Taǵy bir usqa negizinde jeńil relsti tramvaı qalalyq saıabaq arqyly oń jaǵalaýǵa túsip ketýi yqtımal. Sonymen birge, LRT qurylysyn jańa temir jol vokzalynan bastap, Abylaı han dańǵyly arqyly eski vokzalǵa tartý jospary da bar.
«Meniń oıymsha, osy kúzde biz mamandarmen birlese otyryp, qaı jaqqa qaraı jolaýshylardyń aǵyny kóp ekenin zertteıtin bolamyz. Sodan keıin ǵana ınvestorlar boıynsha Úkimetpen protsedýralardy talqylaımyz», - deıdi Áset Isekeshev.
Sonymen birge, ákim qurylystyń bes aýdany boıynsha qalanyń eski bóligin reınnovatsııalaý jumysy josparlanyp otyrǵanyn atap ótti.
«Onyń aıasynda biz kóshelerdi keńeıtetin bolamyz. Alǵashqy kezeńde Asan qaıǵy kóshesi jaıly talqyladyq. Ol jaqta bazar kóp, kósheler úlken emes. Kúnine 30 myń kólikke arnalǵanymen, ary-beri 100 myń kólik ótedi. Mine, osy sebepti, Asan qaıǵy kóshesiniń birneshe bóligin segiz jolaqty, eń az degende alty jolaqty etkimiz keledi», - deıdi ol.
Aıta ketsek, buǵan deıin Astanadaǵy jeńil relsti kólik júıesiniń (Astana LRT jobasy) qurylysyna 16,2 mlrd teńge bólingeli otyrǵany habarlanǵan bolatyn (2018 jyly 9,1 mlrd. teńge, 2019 jyly - 7,1 mlrd. teńge).
