Astanadaǵy jeńil relsti kólik júıesiniń qurylysyna 16,2 mlrd teńge bólindi
ASTANA. QazAqparat - Astanadaǵy jeńil relsti kólik júıesiniń (Astana LRT jobasy) qurylysyna 16,2 mlrd teńge bólindi. Bul týraly Úkimet otyrysynda baıandama jasaǵan QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat tilshisi.
Astana aglomeratsııasyn damytý aıasynda halyqty qonystandyrý jáne óndiristik kúshterdi ornalastyrý, ınjenerlik, kólik, áleýmettik jáne rekreatsııalyq ınfraqurylymdardy damytý júıesin jetildirý jumystary júrgizilip jatyr. Jeńis Qasymbek málim etkendeı, LRT jobasyn iske asyrý úshin 2018 - 2019 jyldarǵa 16,2 mlrd. teńge qarastyrylǵan (2018 jyly 9,1 mlrd. teńge, 2019 jyly - 7,1 mlrd. teńge).
«Qytaılyq kompanııalar konsortsıýmynyń qatysýshysy - «China Railway No.2 Engineering Group Co., Ltd» kompanııasy qurylys-montajdaý jumystaryna lıtsenzııa (1-sanat) alyp otyr. Ol kompanııa tireýish irgetastardy, estakadalardy ornatý jumystaryn júrgizedi. Barlyq jeli boıynsha qurylys nysandaryna 121 aýyr tehnıka men 2 262 jumysshy jumyldyryldy. 2018 jyldyń 16 maýsymyndaǵy jaǵdaı boıynsha 80,5 paıyz uńǵymalardy burǵylaý tireýishteri, 35 paıyz rostverk, 16,8 paıyz tirekter men baǵandar, 10,1 paıyz qurama bilikter ornatyldy. Depo nysandarynda 2 618 tireýishter qaǵyldy»,-dep atap ótti Jeńis Qasymbek.
Sondaı-aq, mınıstrdiń aıtýynsha, Astana qalasynyń syrtqy aınalma joldaryn tuıyqtaý maqsatynda «Astana qalasynyń Ońtústik-Batys aınalma» avtokólik jolyn salý jumystary júrip jatyr.
«Avtojoldyń uzaqtyǵy - 33 shaqyrym. Ol 4 jolaqtyq qozǵalysy bar 1-shi sanatty jol bolyp salynady. Jobaǵa 344 birlik qurylys tehnıkasy, 621 jumysshy jumyldyryldy. Shart boıynsha joldy salý jumystary 2017 jyly bastaldy. Jobany 2019 jyly aıaqtaý josparlanyp otyr»,- dedi mınıstr.
