Astanadaǵy jekemenshik kolledjderdiń stýdentterine jeńildikti jol júrý bıletterin taratý kerek - Elmıra Sýhanberdıeva
ASTANA. QazAqparat - Jekemenshik kolledjderde oqıtyn kóp balaly otbasylardyń stýdentterine jeńildikti jol júrý bıletterin berý kerek. Bul týraly búgin Astanada ótken «dóńgelek ústelde» elordalyq bilim basqarmasynyń basshysy Elmıra Sýhanberdıeva málim etti.
«Jekemenshik kolledjderde oqıtyn kóp balaly otbasylardan shyqqan stýdentter jeńildikti jol júrý bıletterimen qamtamasyz etilmegen. Máslıhat sheshiminde jekemenshik kolledjderde oqıtyndar úshin jeńildikti bıletter qarastyrylmaǵan. Árıne, bıýdjettiń de jaǵdaıyn eskerý kerek, alaıda osy máseleni qarastyrýdy usynamyz», - dedi basqarma basshysy.
Onyń sózine qaraǵanda, búginde kóp balaly otbasylardan shyqqan stýdentterdiń sany 2 016 adamdy qurap otyr. Onyń ishinde jol júrý bıletterimen memlekettik kolledjderdiń 1 312 stýdenti qamtamasyz etilgen.
«Kolledj stýdentteri udaıy qalalyq sharalarǵa jumyldyrylady. Sonymen qatar 2-kýrstan bastap oqý aıaqtalǵanǵa deıin óndiristik-kásibı tájirıbeden ótedi. Osy oraıda jekemenshik kolledjderde oqıtyn kóp balaly otbasylardyń stýdentterin tegin jol júrý bıletterimen qamtamasyz etýdi suraımyz. Osy sanatqa jatatyn 704 bala bar», - dedi E. Sýhanberdıeva.
