Astanadaǵy jekemenshik balabaqshalardy jan basyna qarjylandyrý kólemi 23 myń teńgege jetti
ASTANA. QazAqparat - 2016 jyldyń 1 shildesinen bastap Astanadaǵy mektepaldy jekemenshik uıymdar úshin jan basyna shaqqandaǵy qarjylandyrý bir bala úshin 23 000 teńgege deıin artady. Bul týraly búgin Astana qalalyq Kásipkerler palatasy basshysynyń quqyq máseleleri jónindegi orynbasary Baýyrjan Beısenov málim etti.
«Astana qalasynyń ákimdigi men máslıhatyna tıisti hat joldanǵan bolatyn. Eki tarap ta bizdi qoldady. Qazir memleket tarapynan kórsetiletin demeýqarjy, ıaǵnı, jan basyna shaqqandaǵy qarjylandyrý kólemi bir bala úshin 15 myń 900 teńgeden 23 myń teńgege deıin kóbeıdi», - dedi B.Beısenov elordadaǵy jekemenshik balabaqshalardy damytý máselesi jóninde ótken dóńgelek ústel barysynda.
B.Beısenovtiń aıtýynsha, osy baǵyt aıasynda memleket tarapynan 167 mln teńge demeý qarjy bólinen. «Qaladaǵy jekemenshik balabaqshalar men jekemenshik mektepaldy bilim berý uıymdaryn qoldaý úshin memleket tarapynan osyndaı kómek kórsetilip otyr. Astana qalasyndaǵy jekemenshik balabaqshalardy jan basyna shaqqandaǵy qarjylandyrý kólemi 2012 jyldan beri ósken emes. Qazaqstannyń basqa qalalarynda jan basyna shaqqanda qarjylandyrý kólemi men ata-analar tóleıtin aqy jyl saıyn artyp otyrady. Mysaly, Qaraǵandy oblysynda balabaqshalardy jan basyna shaqqandaǵy qarjylandyrý kólemi 2010 jylǵy 10 825 teńgeden 2016 jyly 17 000 teńgege deıin artqan», - dep túsindirdi B.Beısenov.
