Astanadaǵy jarystyń ekinshi kúni qazaq palýandary taǵy eki Rıo joldamasyn utyp aldy
ASTANA. QazAqparat - Elordada ótip jatqan azııalyq lıtsenzııalyq týrnırde elimizdiń eki palýany Rıo-deJaneıroda ótetin Olımpıada oıyndaryna lıtsenzııa jeńip aldy.
Atap aıtqanda, London Olımpıadasynda qola júldeger atanǵan Gýzel Manıýrova (75 keli) shırek fınalda ırandyq K.Kırannan basym tússe, jartylaı fınalda taıpeılik H.Changtan aılasyn asyrǵan edi. Endi ol aqtyq synda japondyq Rıo Vatarımen beldesedi.
Al erkin kúreste 97 keli salmaq sanatynda jarys jolyna shyqqan Mamed Ibragımov alǵashqy beldesýinde tájik palýany Rýstam Iskandardan basym túsken edi. Jartylaı fınaldyq beldesýdiń sońǵy sekýndtarynda mońǵol palýany Hýderbýlg Dorjhanǵa qaraǵanda belsendilik tanyta bilgen ol fınalǵa joldama aldy.
Aıta keterligi, baıraqty básekeniń alǵashqy kúninde Elmıra Syzdyqova men Ǵalymjan Óserbaev Rıo lıtsenzııasyn ıelengen edi.
Jarystyń ekinshi kúni olımpıadanyń 12 lıtsenzııasy sarapqa salynady. Joldama árbir salmaq sanatynda aqtyq beldesýge shyqqan sportshylarǵa beriledi.
