Astanadaǵy jarylys: Úsh adamnyń jaǵdaıy belgili boldy
ASTANA. QazAqparat - Elordadaǵy jarylys saldarynan zardap shekken úshinshi adam Travmatologııa jáne ortapedııa ǵylymı-zertteý ınstıtýtyna jetkildi. Bul týraly Astana qalasy ákiminiń baspasóz hatshysy Elvıra Júrgenbaeva aıtty, dep habarlaıdy QazAqparat tilshisi.
«Jarylys saldarynan zardap shekken 1991 jáne 1970 jylǵy dúnıege kelgen eki adam 2-3 deńgeıli kúıikpen №1 qalalyq aýrýhananyń qarqyndy terapııa bólimshesine jatqyzyldy. 1979 jyly dúnıege kelgen taǵy bir zardap shegýshi Travmatologııa jáne ortapedııa ǵylymı-zertteý ınstıtýtyna jetkizildi. Dıagnozy anyqtalý ústinde. Barlyq qajetti medıtsınalyq kómek tolyq kólemde kórsetilýde. Oqıǵa ornynda jedel járdemniń 2 brıgasy kezekshilik atqarýda», - dedi ol.
Buǵan deıin, habarlaǵanymyzdaı, Astanada eki qabatty ǵımaratta gaz ballony jaryldy.
«15 naýryz kúni saǵat 17:06 kezinde Astana TJ departamenti pýltine Alash tas joly boıyndaǵy «MolProdýktservıs» JShS-niń eki qabatty ǵımaratynda gaz ballonynyń jarylǵandyǵy týraly aqparat kelip tústi. Saǵat 17:14 shamasynda órt sóndirýshiler jetken ýaqytta birinshi jáne ekinshi qabat arasyndaǵy tóbe bóligi opyrylyp túskendigi anyqtaldy», - delingen QR ІІM TJK resmı ókili Nursultan Nurahmet taratqan málimette.
