Astanadaǵy jármeńkeler azyq-túlik baǵasyn turaqtandyrýǵa yqpal etedi
ASTANA. QazAqparat - Elordanyń turaqtandyrý qorynyń esep-shotynda 1,5 mlrd teńge ıgerilmeı bosqa jatyr. Bul týraly búgin Úkimettiń selektorlyq rejimdegi otyrysynda QR Premer-Mınıstri Baqytjan Saǵyntaev aıtty, dep habarlaıdy QazAqparat tilshisi.
Otyrys barysynda elorda ákimi Baqyt Turlyhanov 9 aıdyń qorytyndysynda ınflıatsııa 103,8 paıyzdy quraǵanyn atap ótti.
«Ótken aımen salystyrǵanda kókónis ónimderi baǵasynyń tómendeýi baıqalýda. Jyl basynan áleýmettik mańyzy bar taýlardyń ındeksi 101 paıyzdy qurady. Naqty qyrkúıek aıynda 98,6 paıyz boldy. Degenmen qant pen kúrishtiń baǵasy 23 jáne 21 paıyzǵa ósti. Turaqtandyrý qorynyń kólemi 940 tonnadan 717 tonnaǵa deıin tómendegenine qaramastan ósip otyr. Biz saraptama jasap jatyrmyz. Turaqtandyrý qorlarynyń esep-shotynda 1,5 mlrd teńge bar», - dedi elorda ákimi.
Sonymen qatar ol baǵany ustap turý úshin elordanyń iri saýda ortalyqtarymen jumystar júrgizilip, óńirlerdiń aýyl sharýashylyǵy jármeńkeleri uıymdastyrylyp jatqanyn aıtty.
«Baqyt Turlyhanuly, taǵy da qaıtalap aıtamyn. Inflıatsııa kórsetkishi joǵary, azyq-túlik taýarlarynyń baǵalary ósýde. Ózińiz aıtttyńyz, turaqtandyrý qorynyń depozıtinde 1,5 mlrd teńge qarjy bar dep. Ony nesine ustap otyrsyzdar? Baǵa ósip jatyr, ınflıatsııa ketip barady. Jyldyń sońy kelip qaldy. 1,5 mlrd teńge ıgerilmeı bosqa jatyr. Jármeńkeni aıttyńyz. Qazir barlyq oblystar kelip jármeńke ótkizýde. Olar baǵanyń tómendeýine yqpalyn tıgizedi deısiz. Senbi, jeksendi kúnder ótken jármeńkelerdiń yqpaly bolmaı jatyr ma? Baǵasy joǵary bolyp tur ma?», - dedi Baqytjan Saǵyntaev.
Óz kezeginde qala basshysy jármeńkelerdiń azyq-túlik baǵasyn turaqtandyrýǵa yqpaly bar ekenin, tek qant pen kúrish baǵasy ǵana elordada kóterilip turǵanyn aıtyp aqtaldy.
«Qant jalǵyz Astanada emes barlyq jerde de ósip otyr», - dep eskertti Premer-Mınıstr.
