Astanadaǵy «Jannur» SÚ-ne jarylǵysh zattyń qoıylǵandyǵyn habarlaǵan 23 jastaǵy jigit alty jylǵa sottalýy múmkin
ASTANA. 1 qazan. QazAqparat - Astanadaǵy «Jannur» SÚ-ne jarylǵysh zattyń qoıylǵandyǵy týraly habarlaǵan er adam ustaldy, dep habarlaıdy elordalyq ІІD.
Esterińizde bolsa, 27 qyrkúıek kúni saǵat 14:35-te Astana qalalyq ІІD-niń Jedel basqarý ortalyǵyna «Jannur» saýda ortalyǵyna qoıylǵan jarylǵysh zat týraly aqparat kelip tústi.
Oqıǵa ornyna tez arada ІІD, ІІB basshylary, jedel tergeý toptarynyń, patrýldik polıtsııa polkiniń qyzmetkerleri, kınologtar, «Arlan» arnaıy bóliminiń jaýyngerleri, sondaı-aq TJD men UQKD mamandary jetti. Barlyǵy 130 qyzmetker men 35 avtotransport pen tehnıka jumyldyryldy.
Ǵımarattan 750 adam qaýipsiz aımaqqa shyǵaryldy. Kınologtar men jarylǵysh zat tehnıkteri ǵımarattyń ishi-syrtyn tolyq tekseristen ótkizdi. Jarylǵysh zat tabylmady.
Al 14:57-de jańaǵy er adam Astana qalalyq ІІD JBO-na qaıtadan qońyraý shalyp, jarylǵysh zat basqa jerde - jekemenshik turǵyn úıde ornatylǵany týraly habarlaǵan. Tártip saqshylary ol jerge de bardy, degenmen, jarylǵysh zat týraly aqparat taǵy rastalmady.
Jedel-izdestirý sharalary kezinde polıtsııa qyzmetkerleri buryn birneshe ret isti bolǵan 1989 jylǵy Ózbekstan Respýblıkasynyń týmasyn ustady.
Jaýap alý kezinde kúdikti qylmysyn moıyndady. Zattyq aıǵaqtar tárkilendi.
Ustalǵan azamat qamaýǵa alyndy. Oǵan qatysty 6 jylǵa deıin bas bostandyqtan aıyrýdy kózdeıtin QR QK-niń 242-baby boıynsha qylmystyq is qozǵaldy.
Sonymen qatar, jalǵan aqparat berý arqyly ol jalpy somasy 2,8 mln. teńge kóleminde shyǵyn keltirdi. Onyń 540 myńy jedel qyzmetterge, al 2 mln. 260 myńnan astamy «Jannur» saýda úıindegi saýda fırmalaryna keltirildi. Ol shyǵyn sot arqyly qylmyskerden alynatyn bolady. Tergeý amaldary jalǵasýda.
Astana qalasynyń ІІD atap ótkendeı, 2012 jyly terrorıstik akt týraly jalǵan aqparat berý áreketteri úshin jazalaý aıtarlyqtaı qatańdatyldy. Eger buryn QR QK 242 babynyń sanktsııasy jaza retinde aıyppul nemese bir-eki jylǵa túzeý jumystaryn, ıa bolmasa 6 aıǵa deıin qamaý, ne 2 jyldan aspaıtyn bas bostandyǵynan aıyrý jazalaryn belgilegen bolsa, qazir mundaı qylmys jasaǵan adamdarǵa aıyppul nemese 7 jylǵa deıin bas bostandyǵyn shekteý, ıakı 6 jylǵa deıin bas bostandyǵynan aıyrý jazalary kesiledi.
