Astanadaǵy janar-jaǵarmaı quıý stansysyn tonaǵandar quryqtaldy - Astana ІІD
ASTANA. 8 qarasha. QazAqparat /Rýslan Ǵabbasov/ - 7 qarashada Astanadaǵy janar-jaǵarmaı quıý stansysyn tonaǵandar quryqtaldy.
Bul týraly búgin bolǵan baspasóz máslıhatynda qalalyq ІІD Tergeý jónindegi basqarmasynyń bastyǵy Ǵumar Shynybekov aıtty.
«Atap aıtqanda, keshe shashamen saǵat 03:50-de belgisiz azamattar jaǵarmaı quıý stansysynda travmatıkalyq tapansha qoldaný arqyly aqshalaı qarjy men múlikti ashyq tonaǵany týraly habar tústi. Tergeý barysynda qara betperde kıgen belgisiz tulǵalardyń basyp kirgeni anyqtaldy»,-dedi ol.
Basqarma bastyǵynyń aıtýynsha, qaraqshylyq shabýyl jasaǵandardyń biri pnevmatıkalyq tapanshadan kúzetshini atyp, sodan keıin aqsha talap etken.
«Osy qylmystyq áreket barysynda olar jaǵarmaı quıý stansysynan jalpy somasy 127 myń 600 teńgeniniń «Aktıv» jáne «Bılaıyn» uıaly telefon kartalaryn, sonymen qatar kassadaǵy qarajat pen esepshiniń uıaly telefonyn alǵan»,-dedi Ǵ. Shynybekov.
Osy qylmystyq derek boıynsha jedel-tergeý toby qurylyp, jedel izdestirý sharalaryn júrgizý barysynda shabýyl jasaǵan 4 azamat ustaldy. Olar Aqmola jáne Qyzylorda oblystarynyń týmalary eken.
Aıta keteıik, bul ustalǵandardy tekserý kezinde olardyń bıylǵy 19 qazanda Ońtústik-Shyǵys shaǵyn aýdanyndaǵy dúkenge jasalǵan qaraqshylyq shabýylǵa qatystylyǵy anyqtaldy. Qazirgi kezde olardyń basqa da qylmystarǵa qatystylyǵy tekserilýde.
