Astanadaǵy jańa júıe elektr jelisindegi apatty shuǵyl anyqtaıdy
ASTANA. QazAqparat - Astanada kósheni jaryqtandyrýdyń zııatkerlik júıesi engiziledi. Bul týraly «Astana - damý men ınnovatsııanyń 20 jyly» forýmynda «Astana Innovations» AQ basqarma tóraǵasy Oljas Sartaev málim etti, dep habarlaıdy QazAqparat.
«Júzege asyrý kezeńine kósheni jaryqtandyrýdyń «aqyldy» júıesin qurý boıynsha joba daıyndaldy. Basqarýdyń zııatkerlik júıesin paıdalaný negizinde daıyndalǵan bul joba barlyq málimetterge avtomatty túrde taldaý jasaıdy. Bul turǵyda baqylaý júıesiniń kórsetkishterin adamnyń qatysýynsyz taldap, qorytyndy aqparatty ortaq ekranǵa shyǵarady», - dep túsindirdi O. Sartaev.
Onyń aıtýynsha, atalǵan tehnologııalar elektr jelilerinde oryn alǵan apattardy jedel anyqtap, olardy joıýǵa múmkindik beredi.
«Jalpy alǵanda, biz barlyq júıeni baqylaı alamyz. Apattar men ózge de jaǵdaılar týyndaǵan kezde júıe barlyǵyn aıqyndap, problemalar týyndaǵan nysandy kórsetedi»,- dep qosty Oljas Sartaev.
