Astanadaǵy jańa Oqýshylar saraıyna qyzmetkerler konkýrstyq negizde qabyldanady - I.Tasmaǵambetov
ASTANA. 16 qarasha. QazAqparat /Gúlmıra Alıakparova/ - Astanada jańadan salynyp jatqan Oqýshylar saraıyna qyzmetke qabyldaý konkýrstyq negizde júrgiziletin bolady. Bul týraly óziniń jeke blogynda turǵyndardyń saýalyna jaýap bergen elorda ákimi Imanǵalı Tasmaǵambetov aıtty.
24 jastaǵy elordalyq turǵynnyń «Táýelsizdik pen Momyshuly dańǵyldarynyń qıylysynda jańadan boı kóterip jatqan Oqýshylar saraıyna jumysqa qalaı ornalasýǵa bolady?», - degen suraǵyna ákimniń bergen jaýaby kelesideı boldy: «Qazirgi ýaqytta jańa Oqýshylar saraıynyń qyzmetkerler shtatyn qalyptastyrý júrgizilip jatqan joq. Degenmen, ákimshilikten bastap tehnıkalyqqa deıingi barlyq qyzmetterge qabyldaý konkýrstyq negizde júzege asyrylatynyn aıta alamyn. Jańa Oqýshylar saraıynyń múmkindikteri kún saıyn ártúrli jastaǵy myńdaǵan bala qatysa alatyn 100-ge jýyq úıirme, stýdııa men sektsııalardy ashýǵa múmkindik beredi», - dedi ol.
I.Tasmaǵambetov atap kórsetkendeı, balalarmen jumys isteýge kreatıvti, jigerli, óz jumysyn súıetin, óskeleń urpaqty shyǵarmashylyqqa baýlı alatyn adamdar kelgeni mańyzdy.
