Astanadaǵy jańa mektepte «Abaıtaný» páni oqytylady
«Jańa oqý jylynda Nur-Sultan qalasynda Abaı Qunanbaıuly atyndaǵy jańa mektep ashyldy. Bul, elordada uly oıshyldyń atymen atalǵan tuńǵysh mektep. Sonymen qatar, mektepte alǵashqy kúnnen bastap «Abaıtaný» ınteraktıvti kabıneti ashylady. Synyp murajaı úlgisinde jasalǵan, sondyqtan balalar birden Abaı murasyna qanyǵar degen úmittemiz», - dedi Nuraly Qudaıbergenov agenttik tilshisine.
Ol sondaı-aq ınteraktıvti kabınette balalar ınnovatsııalyq tehnologııalar boıynsha pándi oqıtynyn atap ótti.
«Biz «Abaıtaný» atty biregeı keshen ázirledik. Ol zamannyń talaptaryna tolyǵymen saı keledi. ıAǵnı, kompıýterlerdiń, ınteraktıvti taqtanyń kómegimen balalar Abaı murasyn tereń zertteı alady. Sol jerde Hákimniń barlyq shyǵarmalary, óleńderi elektrondy túrde qoljetimdi bolady. Mysaly, balalar kúrdeli sózderdiń mánin sol jerden birden taba alady. Sonymen qatar, oqýshylarǵa óleńderdi jatqa oqýǵa, ár mátindi ajyratýǵa úıretedi. Abaı shyǵarmalarymen jumystar balalarǵa olardy jattap alyp qoımaı, oıshyldyń eńbegin tereń tanyp bilýge, ómirlik danalyqty meńgerýge múmkindik beredi», - dedi N. Qudaıbergenov.
Sonymen qatar, akademııa basshysy mundaı synyptar elimizdiń barlyq mektepterinde engiziletinine senim bildirdi.
«Abaıtaný» ınteraktıvti kabınetteri búgingi kúni jumysyn bastap ketti. Biz mundaı kabınetterdiń Qazaqstannyń barlyq mektepterinde, aýdan, oblys ortalyqtarynda bolǵanyn qalaımyz. Abaıdyń jańa tehnologııalar boıynsha ilimderi bar mektepter kóp bolǵan saıyn balalar rýhanı-adamgershilik tárbıege ıe bolady», - dedi ol.
«Abaıtaný» pánin fakýltatıvtik kýrs retinde 9-11 synyp oqýshylary oqıdy.
Interaktıvti kabınet birinshi synyp oqýshylary úshin de qoljetimdi. Jalpy, bul kabınetke Abaı murasyn zerttegisi keletinderdiń bári de kire alady.
Sondaı-aq, spıker jańa mektep Abaıǵa arnalǵan barlyq is-sharalardy tartý ortalyǵyna aınalatynyn atap ótti. Kelesi jyly oıshyldyń 175 jyldyǵyna arnalǵan kóptegen is-sharalar uıymdastyrylady.
«Abaıdy taný – tereń ári turaqty protsess. Kelesi jyly biz uly aqynnyń 175 jyldyǵyn atap ótemiz. Abaıdyń 175 jyldyǵy Qazaqstan úshin mańyzdy dataǵa aınalaıyn dep tur. Biz Hákimniń neden jeringenin, neden ǵıbrat alǵanyn uǵynýymyz kerek. Hákimdi tereń túsiný úshin kóptegen abaıtanýshylar eńbek etti. Abaıdy qazaqqa tanytýda Ahmet Baıtursynulynyń, Muhtar Áýezovtiń, Mekemtas Myrzahmetovtiń eńbegi zor», - dedi ol.
Eske sala ketsek, QR Premer-Mınıstri Asqar Mamın Nur-Sultanda Abaı Qunanbaıuly atyndaǵy №87 mektep-gımnazııanyń ashylý saltanatyna qatysqan bolatyn.
