Astanadaǵy jańa kameralar avtokólikterdi tolyq baqylaýǵa alady
ASTANA. QazAqparat - Jaz aılarynda Astana kósheleriniń boıynda óziniń erekshe pishinimen kózge túsetin beınekameralar kóptep ornatylyp jatqanyn baıqaýǵa bolady. Osy oraıda Astana ákimdigi «QazAqparat» agenttigine bul qurylǵylar qandaı quqyqbuzýshylyqtardy tirkeıtindigi týraly málimet berdi.
«Qazirgi kezde ornatylyp qoıǵan beınekameralar testilik rejimde jumys istep tur, sondyqtan aıyppul ázirge qarastyrylmaıdy. Beınebaqylaý kameralary tolyq jumys isteı bastaǵan kezde qala turǵyndaryn aldyn ala eskertetin bolamyz. Búginde beınejazbalar únemi damý ústindegi qalalarda tıimdiligin ári qajettigin kórsetti»,-delingen ákimdik málimetinde.
Atap aıtqanda, bir baǵanǵa osyndaı kameralardyń úsheýi nemese tórteýi qatarynan ornatylyp jatqany belgili. Jalpy, bul qurylǵylar qandaı ereje buzý áreketterin baqylaıtyny belgili boldy. Astanalyq quqyq qorǵaý organdarynyń baıqaýynsha, beınebaqylaýlar júıesiniń qaladaǵy operatıvtik jaǵdaıǵa, qoǵamdyq tártipti qorǵaýǵa jáne jol qaýipsizdigine tıgizgen septigi zor.
Jalpy, bul qurylǵylar nómirlerdi, jyldamdyq rejimin, júrgizýshilerdi, avtokólik toqtaıtyn jolaqty, sondaı-aq avtobýs jolaqtaryn qıyp ótý jaǵdaılaryn taspaǵa basady. Budan bólek, qoqystardy, temeki tuqylyn tastaǵandardy jáne taǵy da basqa zańbuzýshylyqtardy elektrondyq kóz tirkep otyr.
«Osy qurylǵylardyń múmkindigimen qala ishinde júrgen avtokólikterdiń 99 paıyzy boıynsha aqparat alý josparda bar»,-deıdi mamandar.
Beınekameralar tolyqtaı iske qosylǵan ýaqytta ereje buzǵan júrgizýshilerge aıyppul poshta arqyly jiberiledi nemese Egov portalyndaǵy jeke kabınetine habarlandyrý keledi.
Budan buryn habarlanǵandaı, Astana turǵyndary qala kóshelerindegi kameralar túsirgen vıdeomaterıaldardy ala alady.
htt
