Astanadaǵy Jambyl oblysynyń jármeńkesine 300 tonna ónim jetkiziledi
ASTANA. QazAqparat - 24-25 qyrkúıek kúnderi Astanada ótetin jármeńkege Jambyldan arnaıy kerýen attandy. 15-ten astam júk kóligimen Elordaǵa 300 tonnadan astam aýylsharýashylyq ónimderi jetkiziledi.
Oblys ákiminiń baspasóz qyzmetiniń habarlaýynsha, jambyldyq taýar óndirýshilerdiń qatysýymen ótetin jármeńkege 30-dan astam ónim túrleri qoıylady. Jalpy quny - 237,5 mln teńge. Onyń ishinde 10 tonna jylqy, 1,4 tonna taýyq eti, 5 tonna shujyq , 10 tonna sút ónimderi , 11 myń dana jumyrtqa, 1,5 tonna kondıterlik jáne 6 tonna makaron ónimderi, bar. Sondaı-aq astanalyqtarǵa 10 tonna qant, 0,5 tonna tuz, 5 tonna balyq, 2,2 tonna bal, 4,2 tonna qymyz ben shubat jáne 245,3 tonna jemis-jıdek pen kókónister usynylady.
Sapaly, dámdi, tabıǵı taza bazar baǵasynan quny tómen taýarlardy elorda turǵyndary aldaǵy eki kúnde eski ortalyq alańnan satyp alýǵa múmkindikteri bar.
Esterińizge sala keteıik atalǵan is-shara Qazaqstan Respýblıkasy Táýelsizdiginiń 25 jyldyǵyna oraı Astana qalasyndaǵy «Tarıhy tereń Tarazdan taǵzym» atty Jambyl oblysynyń kúnderi aıasynda uıymdastyrylyp jatyr.
