Astanadaǵy «Jaǵalaý» shaǵynaýdanynda polıtsııa bólimi ashyldy
ASTANA. QazAqparat - Konstıtýtsııa kúni merekesine oraı Esil aýdanyna qarasty «Jaǵalaý» shaǵynaýdanynda polıtsııa bólimi ashyldy, dep habarlaıdy QazAqparat.
Ashylý saltanatynda sóz sóılegen «Esil» aýdanynyń ákimi Tólegen Zakarıanov shaǵynaýdan turǵyndaryn Konstıtýtsııa kúni meıramymen quttyqtap, jańadan ashylǵan polıtsııa bóliminiń jumysyna, qyzmetkerlerine sáttilik tiledi.
«Qazaqstan - demokratııa qaǵıdattaryn berik ustanǵan, zaıyrly, quqyqtyq memleket, órkenıetti qoǵam qurý jolynda óz baǵytyn aıqyndaǵan, berik ustanymy bar el. Qalamyz jyldan-jylǵa damyp, kórkeıip keledi, aýdanymyzdyń qala boıynsha úlgili aýdan bolýy siz ben bizdiń tyǵyz baılanystaǵy qajyrly eńbegimizdiń jemisi. «Esil» aýdany ákimdigi turǵyndardyń árbir usynysyna qulaq túrip, qoldaý bildirýge daıyn. Osy ashylyp otyrǵan polıtsııa bólimi aýdanymyzdaǵy qoǵamdyq tártipti odan ári kúsheıte túsedi degen oıdamyn», - dedi T. Zakarıanov.
«Jaǵalaý» shaǵynaýdanynda ashylǵan polıtsııa bólimi Sh. Aıtmatov kóshesi, 29a mekenjaıynda ornalasqan. Polıtsııa bólimi barlyq kerek-jaraqpen qamtamasyz etilgen. №26 polıtsııa bóliminde ázirge bes tártip saqshysy qyzmet etedi.
«Bul polıtsııa bólimi osy shaǵyn aýdandaǵy qoǵamdyq tártipti qadaǵalaý jáne qylmystyń aldyn alý úshin ashylyp otyr. Polıtsııa bóliminiń qyzmetkerleri aýdan turǵandarymen tyǵyz qarym-qatynasta jumys jasaıdy. Zaıyrly qoǵamnyń ustanymy - quqyqtyq memleket qurý, osy jolda sizder bizdiń bólimniń qyzmetkerlerine járdemdesesizder degen oıdamyn», - deıdi Іshki ister departamentiniń basshysy, polıtsııa general-maıory Marat Qojaev.
