Astanadaǵy velojoldy uzartýǵa qosymsha 2,4 mlrd teńge kerek

NUR-SULTAN. QazAqparat – Nur-Sultan qalasynyń qorshaǵan ortany qorǵaý jáne tabıǵat paıdalanýdy retteý basqarmasy shaharda velosıped kóligi ınfraqurylymyn damytýdyń ekinshi kezeńine 2,4 mlrd teńge surap otyr, dep habarlaıdy QazAqparat tilshisi.

Bul týraly basqarma basshysy Álııa Qojabaeva oblystyq máslıhat janyndaǵy turaqty bıýdjettik komıssııanyń otyrysynda aıtty.

«Qorshaǵan ortany qorǵaý jáne tabıǵat paıdalanýdy retteý basqarmasy boıynsha qajetti qosymsha qarajat kólemi – 5,9 mlrd teńge. Velosıped kóligine qajet ınfraqurylym salýdyń ekinshi kezeńine 2,4 mlrd teńge qajet», - dedi Álııa Qojabaeva.

Sondaı-aq, ol bosaǵan plastık qutylardy satyp alatyn arnaıy fandomatttar ornatý josparlanǵanyn aıtty. Osy arqyly jastardy plastık qaldyqtardy kóshege tastamaýǵa tárbıeleý kózdelip otyr.

«Quramynda synap bar qaldyqtar salýǵa arnalǵan konteıner satyp alýǵa - 51 mln teńge, metall konteıner alýǵa - 540 mln teńge, ruqsat etilmegen kúresinderge monıtorıng jasaý qyzmetin satyp alýǵa - 40 mln teńge, plastık quty qabyldaıtyn fandomattar satyp alýǵa 55 mln teńge kózdelip otyr», - dedi basqarma basshysy.

Ákimdik ókili astananyń «Jasyl beldeýindegi» jasyl alqapty qorǵaıtyn órt sóndirý-hımııalyq stansa qurylysyna 635 mln teńge surap otyrǵandaryn da aıtty.

Buǵan deıin jazǵanymyzdaı, Nur-Sultan qalasynyń mádenıet basqarmasy astana teatrlaryna balalardyń tegin kirýi úshin 63 mln teńge surap otyr.