Astanadaǵy Ýspen kafedraldy soborynda Rojdestvo merekesine oraı dinı rásimder ótti
ASTANA. 7 qańtar. QazAqparat - Búgin Astanadaǵy Ýspen kafedraldy shirkeýinde pravoslav dinin ustanýshylar álemniń kóptegen elderiniń halqymen birge Rojdestvo merekesin atap ótýde.
Atap aıtqanda, arnaıy merekelik qyzmetter respýblıkanyń barlyq shirkeýlerinde ótýde. Bul eń negizgi jáne ulyq hrıstıan merekeleriniń biri. Onyń uzaq jylǵy tarıhy bar. Osy oraıda búgingi merekede Ýspen kafedraldy sobory muqtaj adamdarǵa kómek qolyn sozýǵa shaqyrdy.
«Rojdestvo merekesi dindarlardyń barlyǵynyń qaıyrymdylyq, ózara járdemdesý jáne súıispenshilik sezimderin, bıik gýmanıstik jáne jasampazdyq murattaryn biriktiredi»,-deıdi Ýspen kafedraldy soborynyń protoıereıi Dımıtrıı Baıdek.
Óz sózinde D. Baıdek Qazaqstanda táýelsizdiktiń alǵashqy kúnderinen bastap-aq adamzatty súıý, beıbitshilik pen kelisim saıasaty júrgizilip kele jatqandyǵyn atap ótti. Bul turǵyda ol Qazaqstanda Álemdik dinder kóshbasshylarynyń sezderi ótkizilip jatqandyǵyn, bizdiń elimiz atalǵan dinı jıyndy ótkizýge laıyq bolyp otyrǵandyǵyn basa aıtty.
Astanadaǵy Ýspen kafedraldy shirkeýinde jıylǵan jurtshylyq aldynda Elbasy Nursultan Nazarbaevtyń Rojdestvo merekesine arnalǵan quttyqtaýy oqyldy. «Memlekettiń óz azamattarynyń rýhanı umtylysyna degen izgi de syılastyqty kózqarasy - bizdiń elimizdegi dinaralyq kelisimniń eń basty negizderiniń biri. Adamzattyń máńgilik aqıqattaryna, adamgershilikke, ózara qurmet pen qoldaýǵa súıene otyryp, biz barlyq konfessııalardyń damýyna jaǵdaı jasadyq, ortaq úıimiz - Qazaqstan Respýblıkasynda beıbitshilik pen kelisimdi saqtaı aldyq»,-delingen Prezıdent quttyqtaýynda.
