Astanadaǵy úsh mekteptiń dırektoryna pedagog ádebin saqtamaǵany úshin eskertý berilgen
NUR-SULTAN. QazAqparat – Elordadaǵy úsh mekteptiń basshysyna pedagog ádebi normalaryn saqtamaǵany úshin eskertý berildi, - dep habarlaıdy QazAqparat tilshisi.Bul týraly Nur-Sultan qalasy ákimdiginde ótken «Pedagog mártebesi týraly» Zań normalarynyń iske asyrylýy týraly onlaın baspasóz máslıhatynda aıtyldy.
Nur-Sultan qalasy Bilim sapasyn qamtamasyz etý departamentiniń basshysy Baǵym Kóptileýovanyń aıtýynsha, jyl basynan beri departament janynan Pedagogtik ádep jónindegi keńes jumys istep keledi.
«Keńeske osy keıingi 9 aıdyń ishinde 20 pedagogten jazbasha ótinish tústi. Onyń tórteý balabaqsha, 16-sy mektep pedagoginen túsken. Shaǵymdar boıynsha júrzililgen monıtorıngtiń qorytyndysy olardyń kóbi pedagog quqyǵynyń buzylýyna, ádep normalarynyń saqtalmaýyna, muǵalimderdiń ózara túsinispeýshiligine, normatıvtik aptalyq oqý júktemesiniń bólinýine nemese attestattaýdan ótýge baılanysty ekenin kórsetti.
Bilim jáne ǵylym mınıstriniń tapsyrmasy boıynsha pedagogti kásiptik qyzmetinen tys jumystarǵa tartý, basylymdarǵa májbúrlep jazý, qosymsha eseptilikti talap etý, jalaqyny ýaqtyly almaý sııaqty jaıttar boıynsha aqparat quraldary men áleýmettik jelilerge, call-ortalyqtarǵa kelgen ótinishter boıynsha da monıtorıng júrgizip otyrmyz», - dedi departament basshysy.
Baǵym Kóptileýova bıyl túsken shaǵymdar negizinde 4 bilim berý nysanynyń basshysy tártiptik jazaǵa tartylǵanyn aıtty.
«2021 jyldyń 4 aıynda kelip túsken shaǵymdar boıynsha bir balabaqshanyń, 3 mekteptiń bashysyna tártiptik shara qoldanyldy. Sonymen qatar, ótinishte kórsetilgen 3 fakt naqty dáleldenbedi. Balabaqsha basyshsynyń áreketterine eki pedagogten shaǵym túsken bolatyn. Meńgerýshige Bilim jáne ǵylym mınıstriniń №190 buıryǵynda kórsetilgen pedagogtik normany saqtamaǵany úshin eskertý jasaldy. Úsh mektep basshysy da dál osyndaı áreketi úshin eskertý aldy», - dedi departament basshysy.
