Astanadaǵy Ulttyq muraǵat ǵımaratynda professor Ábsattar qajy Derbisáli eńbekteriniń qory ashyldy

 dep habarlaıdy QazAqparat.

Qorda ǵalymnyń dıssertatsııalyq ǵylymı zertteýleri, álemdegi muraǵattardan Qazaqstan tarıhyna qatysty jınaqtaǵan qundy qujattary, qoljazbalary men orden, medaldarynyń kýálikteri, barlyǵy 53 qujat pen materıal jınaqtalǵan.

Ábsattar qajy Derbisáli kópjylǵy eńbeginiń arqasynda úlken ǵylymı jetistikterge qol jetkizdi. Muhammed Haıdar Dýlatıdiń «Jahan name» atty eńbegin aýdaryp, oǵan túsinikteme berdi. Tarıhı mańyzy bar eńbekti basyp ta shyǵardy. Kashmır jerinde babamyz H.Dýlatıdiń zıratyn taýyp, qulpytasta jazylǵan jazýlar syryn sheshti. Elimizdiń Farab qalasynan shyqqan ǵulama Ál-Farabıdiń elýge tarta eńbekterine taldaý jasap, ǵylymı aınalymǵa engizdi. Sol sııaqty Syǵanaqı men Kerderıdiń talaı eńbekterin barshaǵa máshhúr etti.

«Bizdiń tarıhymyz óte baı. Ǵalymdar eńbekterin kópshilikke tapsyrsyn, bolashaq urpaqqa qalsyn. Keıin bizdiń urpaqtarymyz osy eńbekterdi oqyp, bizdiń qazaq halqy uly halyq deıtindeı bolsyn», deıdi Á. Derbisáli. «Qazir men Qazaq dalasynyń juldyzdary» atty eńbekti tolyqtyrý ústindemin. Elýge tarta baspa tabaq bolyp qaldy. Arab tiliniń túsindirme sózdiginiń alty tomyn jazǵan Ál-Farabı eńbekteri kez kelgen arab aspırantynyń, magıstrantynyń qolynda júrgen dúnıe eken. Biz ony bilmeımiz», dep atap kórsetti professor.    

  Ulttyq muraǵat tanymal zertteýshilerdiń qundy qujattaryn, baǵaly eńbekterin qabyldaýdy dástúr etken. Úsh jyl ishinde qazaqtyń  onǵa jýyq zııalylarynyń qorlary ashylǵan.