Astanadaǵy Ulttyq ana men bala ǵylymı ortalyǵynda alyp bala dúnıege keldi
ASTANA. 5 shilde. QazAqparat - Elordadaǵy Ulttyq ana men bala ǵylymı ortalyǵynda 7 kelige jýyq (6 kg 820 g) náreste týdy.
37 apta júktilik merziminde dúnıe esigin ashqan sharananyń boıy - 63 sm. Ortalyqtyń joǵary bilikti mamandary áıeldi kesarev otasy arqyly bosandyryp aldy. Sebebi náresteniń dene áleýeti tym iri bolǵan. Qazirgi ýaqytta alyp bala men onyń anasynyń hal-jaǵdaıy jaqsy, dárigerlerdiń aıtýynsha, jaqyn arada úılerine jiberiledi. Shekesi torsyqtaı balany dúnıege ákelgen ananyń bul tuńǵyshy emes. Birinshi qyz balasy 3 keli 500 gramm tartqan bolsa, ekinshi ul balasy 4 keli 100 gramm bolǵan.
Dárigerlerdiń aıtýynsha, klınıkanyń 5 jyldyq ǵumyrynda bul tirkelgen alǵashqy oqıǵa. Bunyń aldynda aǵymdaǵy jyldyń aqpan aıynda Kókshetaý qalasynda 6 keli 645 gramm salmaǵy bar qyz dúnıege kelgen bolatyn. Balalardyń ortasha salmaǵy 3-4 keli tartady. Sonyń ishinde 4 kelilik balalar iri bolyp sanalady. Eń iri náreste 1955 jyly Italııada týǵan. Onyń salmaǵy 10 keliden asyp jyǵylǵan. Sodan beri bul rekord áli jańartylǵan emes.
