Astanadaǵy úleskerlerdiń máselesi 2010 jyldyń sońyna deıin sheshiledi
ASTANA. Aqpannyń 24-i. QazAqparat /Jasulan Amanbaıuly/ - 2010 jyly 61 turǵyn úı kesheniniń qurylysy tolyqtaı bitip, úleskerlerdiń máselesi sheshiledi. Bul týraly búgin elordadaǵy birqatar turǵyn úı nysandarynyń qurylysy barysymen tanysý kezinde Astana ákimi Imanǵalı Tasmaǵambetov málim etti,
dep habarlaıdy QazAqparat.
Búgin Astana ákimi Imanǵalı Tasmaǵambetov jáne «Samuryq-Qazyna» UÁQ-nyń basqarma tóraǵasy Qaırat Kelimbetov «Infınıtı», «Soltústik shuǵylasy», «Esil», «Kaspıan Palas», «Astana juldyzy», «Marııa» jáne «Granıtnyı» turǵyn úı keshenderiniń qurylys barysymen tanysyp, nysandardy aralap shyqty.
I. Tasmaǵambetovtiń aıtýynsha, qaladaǵy úleskerlerdiń qatysýymen salynyp jatqan turǵyn úılerdiń qurylysy aldynda negizgi máseleler sheshilgen. «Onda eshqandaı problema kóterilip otyrǵan joq. Qarjymen qamtamasyz etilgen, jumys qarqyndy túrde júrip jatyr. Jalpy 2010 jyly 61 turǵyn úı kesheniniń qurylysy tolyqtaı bitip, úleskerlerdiń máselesi sheshiledi», dep atap kórsetti ol.
2009 jyly 62 qurylys nysany aıaqtalǵan bolatyn. Onda 12,5 myńnan asa úlesker baspanaly boldy. Al 2010 jylǵa qoıyp otyrǵan mindet - úleskerleri bar qurylystardyń barlyǵyn bitirý. Ondaı qurylystardyń sany - 61. Onyń 19-y «Samuryq-Qazyna» qorynyń qarjy salýymen aıaqtalmaqshy.
