Astanadaǵy Úleskerlerdi qoldaý ortalyǵyna 700 adam kómek surap kelgen

ASTANA. QazAqparat - Astana qalasynda 2017 jyldyń tamyzynan bastap «bir tereze» qaǵıdatymen Úleskerlerdi qoldaý ortalyǵy jumys isteıdi. Elorda prokýratýrasynyń bastamasymen qurylǵan ortalyqqa búginge deıin 700 adam kómek surap júgingen, dep habarlaıdy QazAqparat tilshisi.

Ortalyqta azamattar ótinimderin tapsyryp, qurylys kompanııasy,  qurylystyń júrý qarqyny jáne osy saladaǵy qylmystyq isterdiń tergelý barysy týraly aqparat ala alady. Halyqqa bilikti qyzmetti prokýratýra jáne ákimdik qyzmetkerleri, medıatorlar men ózge de ýákiletti organ ókilderi kórsetedi.

«Ortalyq jumysyn bastaǵaly beri 700 adamǵa zańgerlik kómek kórsetildi. Onda azamattarǵa «Turǵyn úı qurylysyna úlestik qatysý týraly» zańda jazylǵanyndaı, úleskerlerdiń qarajatyn tartý tetikteri túsindiriledi», - delingen Astana qalasy prokýratýrasynyń baspasóz habarlamasynda.

Prokýratýra, sondaı-aq úlestik qatysýmen úı salý úshin qurylys kompanııalaryna qoıylatyn mindetti sharttardy eske saldy.

Birinshisi - Turǵyn úı qurylysyna kepildik berý qorynyń kepildigin alý. Ekinshi talap - ekinshi deńgeıli banktiń qatysýy. Úshinshisi - turǵyn úı qabyrǵasyn turǵyzý úshin ákimdiktiń ruqsaty. Barlyq jaǵdaıda úlestik qatysý týraly kelisimshartqa qol qoıylady, olar ákimdikte tirkeledi. Ózge quqyqtyq formada jasalǵan kelisimsharttar zańsyz bolyp tabylady.

«Osyndaı buzýshylyqtar úshin QR ÁQBtK-niń 320-baby (turǵyn úı qurylysyna úlestik qatysý týraly zańnyń talaptaryn buzý) boıynsha ákimshilik jaýapkershilik kózdelgen. Osy jyldyń basynan beri atalǵan bap boıynsha 15 kompanııa ákimshilik jaýapkershilikke tartyldy», - delingen habarlamada.