Astanadaǵy tútin Reseı ormandarynyń órtinen kelip jatyr
NUR-SULTAN. QazAqparat – Elordalyq Taýarlar men qyzmetter qaýipsizdigi jáne sapasyn baqylaý departamentiniń basshysy Sádýaqas Baıǵabylov qaladaǵy tútinniń neden paıda bolǵanyn túsindirdi, dep habarlaıdy QazAqparat tilshisi.
«Ádette astana qysqy jylytý maýsymynda ǵana tútinge oranatyn. Biraq búgingi tútin Sibir ormandaryndaǵy órtpen tyǵyz baılanysty. Jeldiń baǵytymen órt tútini Qazaqstan aýmaǵyna da jetti», - dep túsindirdi S. Baıǵabylov QazAqparat tilshisine bergen suhbatta.
Onyń aıtýynsha, 25 shildede Reseı Federatsııasynyń Irkýtsk oblysy men Krasnoıar ólkesinde 1 mln gektardan astam orman órtenip jatyr.
«Sáıkesinshe, órt tútini elordaǵa jetti. Eki kúnnen beri Pavlodar qalasynyń turǵyndary dál osyndaı tútinge tap bolǵan edi. Onyń quramynda zııandy zattar joq. Turǵyndardyń densaýlyǵyna esh qaýip tónip turǵan joq. Alańdaýǵa da negiz joq», - dedi deparatment basshysy.
S. Baıǵabylov tútinniń shamamen eki kúnge sozylatynyn aıtty. Demalys kúnderi aýa raıy qalpyna keledi.
Aıta keteıik, «Qazgıdromet» RMK Nur-Sultan qalasynyń 24 men 25 shildedegi atmosferalyq aýanyń jaı-kúıin aıtyp berdi.
Sondaı-aq, Pavlodar oblysy da sońǵy eki kún boıy kúıiktiń ıisi aralas tútinge oranǵan.
