Astanadaǵy tútin Aqmola men Pavlodardaǵy qurǵaq shóptiń órtenýinen bolýy múmkin
ASTANA. QazAqparat - Astana qalasynyń Tótenshe jaǵdaılar departamenti qalany jaılaǵan tútin jóninde pikir bildirdi, dep habarlaıdy QazAqparat tilshisi.
Departamenttiń aıtýynsha elorda aýmaǵynda esh tabıǵı janý tirkelmegen.
«Qaladaǵy jaǵdaı kórshiles Aqmola oblysyndaǵy Býrabaı jáne Zerendi aýdandandaryndaǵy qurǵaq shóptiń órtenýinen jáne Pavlodar oblysyndaǵy órtten bolýy múmkin. Halyq arasynda órt qaýipsizdigi erejelerin túsindirý maqsatynda departament qalanyń saıajaılary men turǵyn alaptarynda daýys zoraıtqysh qurylǵylarmen profılaktıkalyq is-sharalar júrgizýde», - dep jazylǵan TJD habarlamasynda.
Departament kez kelgen ashyq ot kózderimen jumys istegende abaı bolýdy usynady, ot jaǵýǵa nemese ǵımarattardyń janynda qoqystardy jaǵýǵa bolmaıdy.
«Tabıǵat aıasynda janyp turǵan temeki tuqylyn tastamańyz, balalardyń sirińkemen oınaýyna jol bermeńiz jáne ot pen shyny ydysty jáne synǵan áınekti qaldyrmańyz. Demalys orynynan keterde alaýdy sýmen nemese topyraqpen tolyq sóndirińiz. Órt, qoqys jáne turmystyq qaldyqtardy jaǵý kezinde órt qaýipsizdigi erejelerin buzǵany úshin ákimshilik jaýapkershilik qarastyrylǵanyn eskertemiz», - deıdi elordalyq TJD.
