Astanadaǵy týrnırge álemniń 11 elinen 89 bylǵary qolǵap sheberi qatysýda - S. Qonaqbaev
ASTANA. 13 qyrkúıek. QazAqparat /Jasulan Amanbaıuly/ - Búgin, seısenbide elordadaǵy «Dáýlet» sport kesheninde bokstan áıelder arasynda II halyqaralyq týrnır bastaldy.
Búgin, týrnırdiń ashylýyna arnalǵan baspasóz máslıhatynda Qazaqstan boks federatsııasynyń vıtse-prezıdenti, AIBA atqarýshy komıtetiniń múshesi Serik Qonaqbaevtyń málim etkenindeı, Astanaǵa álemniń 11 elinen 89 bylǵary qolǵap sheberi kelip otyr.
«Qazaqstan bul týrnırde bokstan áıelder ulttyq quramasynyń negizgi quramymen qatar, oblystyq jarystarda mamandardyń kózine túsken sportshylardy da usynyp otyr. Olar qazirgi ýaqytta áıelder boksynyń aıaq-alysy jaqsy damyp kele jatqan óńirlerden, Astana, Almaty qalalarynan, Aqmola, Jambyl, Qaraǵandy, Qyzylorda jáne OQO-nan jasaqtalǵan», - dedi S. Qonaqbaev.
Bokstan áıelder ulttyq quramasynyń bas bapkeri Vadım Prısıajnıýktiń atap ótkenindeı, ulttyq komanda jarysqa jaqsy daıarlyqpen kelip otyr. Bul týrnır Qytaıda ótetin Álem birinshiliginiń aldynda qurama daıyndyǵyn taǵy bir pysyqtap alatyn úlken múmkindik bolmaq. Bapkerdiń aıtýynsha, doda qorytyndysy boıynsha, qurama taktıkasyna tıisti túzetýler engiziledi.
«Bokstan Álem birinshilikteriniń jeńimpazdary men júldegerleri Astana-2011 halyqaralyq týrnırine baq talastyra kelip otyr. Sondyqtan bizdiń boksshy qyzdarymyzǵa sharshy alańda ońaı bolmasy anyq», - dedi bas bapker.
