Astanadaǵy týrıstik qyzmet kórsetetin nysandardyń sapa deńgeıin «Astanalyq servıs standarttary: 3S sapa brendi» jobasy anyqtaıtyn bolady
STANA. Tamyzdyń 17-si. QazAqparat /Gúlmıra Álıakparova/ - Astana qalasynyń ákimdigi Elordalyq týrızm qaýymdastyǵymen birlesip, týrısterge qyzmet kórsetetin nysandardyń sapasyn arttyrý maqsatynda «Astanalyq servıs standarttary: 3S sapa brendi» arnaıy jobasyn ázirledi.
Búgin Astanadaǵy «Redııson» qonaq úıinde atalmysh jobanyń tanystyrylymy ótti.
Elordalyq týrızm qaýymdastyǵy dırektorynyń mindetin atqarýshy Vıktorııa Júnisova atap kórsetkendeı, joba týrısterge qandaı da bir qyzmetter kórsetetin nysandardy atap aıtqanda, qonaq úılerdi, dámhanalar men meıramhanalardy, kórsetilim nysandaryn («Báıterek» monýmenti, «Atameken» etno-memorıaldyq kesheni jáne taǵy basqa), oıyn saýyq ortalyqtaryn, týrıstik agenttikter men kólikterdi qamtıtyn bolady.
Jobany júzege asyrýdyń birneshe kezeńi bar. Aldymen, maqsatty topqa kiretin nasyndar jobaǵa qatysý týraly hattamaǵa qol qoıady. Budan keıin qatysýshy nysandardyń «tutynýshylary» arasynda saýalnamalar júrgizilip, olar óńdeledi, aryz-shaǵymdar qaralady. Brend talaptaryna sáıkes kelýi men sapany baǵalaý boıynsha arnaıy komıssııa jumys júrgizedi. «Qupııa klıent» ádisi boıynsha qyzmet kórsetýdiń sapasy tekseriledi.
Qorytyndy aǵymdaǵy jeltoqsan aıynyń sońynda shyǵarylady. Al atalmysh tekseristerden múdirmeı ótken jáne sapa standarttaryna tolyǵymen sáıkes kelgen nysandarǵa «Astanalyq servıs standarttary: 3S sapa brendi» saltanatty túrde tabys etiletin bolady. Oǵan sımvolıkalyq beınelemeler men arnaıy atrıbýttar kiredi.
V.Júnisovanyń aıtýynsha sapa standarttaryn jobany qurastyrýshy taraptar ázirlegen. «Jáne ol eń aldymen, qyzmet kórsetýdegi sapany arttyrýǵa baǵyttalǵan. Sebebi, bizde sapa baǵasyna árqashan saı bola bermeıdi. Jobanyń maqsaty - bul eki shartty sáıkestendirý. Óz kezeginde uıymdastyrýshylar, qyzmetkerlerge shet el tilderin ásirese, aǵylshyn tilin úıretý jáne olardyń biliktilikterin arttyrý boıynsha trenıng-sabaqtar ótkizetin bolady. Al «3S sapa brendine» laıyq dep tanylǵan nysandar qoǵamdaǵy oń ımıdjimen qatar, aqparattyq qoldaýǵa ıe bolady», - dedi ol.
