Astanadaǵy turǵyn úılerdiń birinde bir aıdyń ishinde ekinshi lıfti qulady
ASTANA. QazAqparat - Astanada Kenesary 65 úı mekenjaıynda ornalasqan «Edem palas-1» turǵyn úı kesheniniń 5-kireberisinde lıft qulady, dep habarlaıdy QazAqparat.
Turǵyndardyń biri Tatıana Spıtsynanyń sózi boıynsha, oqıǵa búgin kúndiz 14:00 saǵat shamasynda oryn alǵan. Ol kezde Spıtsyna balasyna dári-dármek alý úshin dárihanaǵa shyqqan bolatyn.
«Bir qyz 17-qabattan túsip kele jatqan edi, bir kezde lıft tómen qaraı zyr qulaı jóneldi. Qosalqy arqan ustap qalsa kerek, 8 ben 9-qabattarda toqtap qaldy. Qazir ol sol jerde tur. Bul týraly konserjge habarlady. Qyzdy biz taptyq, qazir ol shaǵym túsirmek nıette. Biz bul oqıǵany budan buryn bolǵan alǵashqy iske qosqymyz keledi. Sebebi bunyń arty jaqsylyqqa aparmaıdy», - dedi ol QazAqparat tilshisine bergen suhbatynda. 
T.Spıtsynanyń aıtýynsha, turǵyn úı kesheninde lıftke saraptama júrgizilgen. Aldyn ala málimetterge sáıkes, arqan úzilgen.
Aıta keteıik, 13 sáýir kúni Astananyń «Edem palas» turǵyn úı kesheninde segiz adam kirgen lıft qulady. Lıftte segiz adam, altaýy eresek, ekeýi bes jáne alty jastaǵy balalar. Lıft altynshy qabattan birinshi qabatqa deıin qalypty túsip, birinshi qabatta úzilip, jertólege qulaǵan.
Oqıǵadan eshkim zardap shekken joq. Polıtseıler men lıftke qaraıtyn qyzmetkerler esikti ashqan. Qajetti saraptamalar taǵaıyndalyp, QR QK 306-baby boıynsha tergeý júrgizilýde.
