Astanadaǵy «Travmatologııa jáne ortopedııa ǵylymı-zertteý ınstıtýtynda» jańa 4 qabatty operatsııalyq blok ǵımaraty ashyldy
ASTANA. 15 shilde. QazAqparat - «Salamatty Qazaqstan» memlekettik baǵdarlamasyn júzege asyrý aıasynda búgin Astanada QR Densaýlyq saqtaý mınıstrliginiń «Travmatologııa jáne ortopedııa ǵylymı-zertteý ınstıtýtynda» mınıstr Salıdat Qaıyrbekovanyń qatysýymen jańa 4 qabatty operatsııalyq blok ǵımaratynyń ashylýy boldy.
Ǵımarattyń jalpy aýdany 8 726 m2, al jobanyń quny 2 mlrd. 682,18 mln. teńgeni qurady, dep habarlady QR Densaýlyq saqtaý mınıstrliginiń baspasóz qyzmeti.
Jaraqattanýshylyq qazirgi zamanda eń mańyzdy medıtsınalyq-áleýmettik problemalardyń biri bolyp otyr. Qazaqstanda aýrý-syrqaý, ýaqytsha eńbekke qabiletsizdik jáne ólim-jitim qurylymynda jaraqattanýshylyq ekinshi orynda, al múgedektikke alǵash ret shyǵý boıynsha úshinshi orynda tur. Elimizde jyl saıyn 600 myńnan astam adam túrli jaraqattar alady, onyń ishinde 22%-yn - balalar, 78%-yn - jasóspirimder men eresekter quraıdy.
«Travmatologııa jáne ortopedııa ǵylymı-zertteý ınstıtýtynda» jasalynatyn operatsııalar sanynyń turaqty túrde artýyna baılanysty operatsııalyq, jansaqtaý jáne qabyldaý bólimderin keńeıtý asa mańyzdy mindet boldy.
Jańa operatsııalyq blok ǵımaraty qabyldaý-dıagnostıkalyq, operatsııalyq, anestezıologııalyq, jansaqtaý jáne ıntensıvti terapııa, ortalyq zararsyzdandyrý jáne kir jýý bólimderinen turady.
Qabyldaý-dıagnostıkalyq bólimi jedel jáne josparly túrde ákelinetin naýqastardy qabyldaýǵa, aldyn ala dıagnoz qoıýǵa jáne emdik kómek kórsetýge arnalǵan.
Operatsııalyq blok ishi naqty aýmaqtarǵa «sterıldi» jáne «taza» etip bólingen. Blokta aýanyń lamınarly aǵyny qamtamasyz etilgen 9 «taza» operatsııalyq zal bar jáne eń ozyq qural-jabdyqtar ornatylǵan. Onyń ishinde mıkrohırýrgııalyq tehnıka jáne iri býyndar men omyrtqaǵa operatsııalar jasaýǵa arnalǵan endoskopııalyq jabdyqtar bar.
Ortalyq sterıldik bólim arnaýly jabdyqtary bar bir-birimen ózara baılanysty ǵımarattar kesheninen turady jáne materıaldar men qural-jabdyqtardy zararsyzdandyrýǵa arnalǵan.
«Travmatologııa jáne ortopedııa ǵylymı-zertteý ınstıtýtynyń» jańa operatsııalyq blogy iri býyndar aýyrǵanda nemese jaraqat alǵan kezde, omyrtqanyń týa bitken nemese paıda bolǵan aýrýlary kezinde joǵary tehnologııalyq kómekke degen qajettilikti qanaǵattandyrady. Sonymen qatar, travmatologııalyq-ortopedııalyq aýrýlardy emdeýde ınnnovatsııalyq tehnologııalardy endirýge, joǵary mamandandyrylǵan medıtsınalyq kómek sapasyn arttyrýǵa jáne Qazaqstan halqynyń densaýlyǵyn jaqsartýǵa oń yqpal etedi.
