Astanadaǵy tóbeles: Hıramagomedov MMA orynbasaryn aǵasymen birge urǵan
ASTANA. QazAqparat - Astanada ótken Fight Nights Global chempıonatynan keıin reseılik sportshy Gadjımurad Hıramagomedov óziniń týǵan aǵasymen birge RF MMA-nyń vıtse-prezıdenti Radmır Gabdýllın jatqan qonaq úıge baryp, bas tóreshini soqqyǵa jyqqan, dep habarlaıdy QazAqparat tilshisi.
"Reseı Federatsııasynyń eki azamaty buzaqylyq áreketi úshin jaýapqa tartyldy. Olarǵa qatysty ákimshilik xattama rásimdelip, árbireýi 10 AEK (22 690 teńge) kóleminde aıyppul tóleýge mindetteldi", - deıdi Astana qalalyq ІІD baspasóz qyzmetiniń jetekshisi Sofıa Qylyshbekova.
Al reseılik LifeNews saıtynyń aqparatyna sáıkes, Hıramagomedovtyń janynda onyń aǵasy bolǵan. Atalǵan resýrsta Radmır Gabıdýllın jatqan qonaq úıindegi beınebaqylaýdyń bir úzindisi jarııalandy. Onda aǵaıyndy Gadjımurad pen Gamzat Hramagomedovtarǵa uqsaıtyn eki adamnyń bólmege kirip bara jatqany anyq kórinip tur.
Aıta keteıik, jaqynda Astana qalasynda ótken Fight Nights Global chempıonatynda Hıramagomedov qazaqstandyq sportshy Georgıı Kıchıgınge qarsy shyqqan bolatyn. Jekpe-jektiń qorytyndysy boıynsha Kıchıgın Fight Nights chempıony atandy. Alaıda qazaqstandyq sportshy óz qarsylasyn aıqyn basymdyqpen jeńe almady. Oǵan qosa, óz upaılaryn Hıramagomedovke bergen tóreshiler de tabyldy. Al jekpe-jekten keıin reseılik sportshy men Reseı MMA odaǵynyń vıtse-prezıdenti Radmır Gabdýllınniń arasynda janjal týyndady. Sol kezde bas tóreshi qatty jaraqat aldy. Hıramagomedov ony qazaqstandyq boksshyǵa bolysty dep aıyptaǵan. Gabdýllın Máskeýge ushyp kelgen boıda shuǵyl túrde aýrýxanaǵa jatqyzyldy. Onyń jaq súıegi eki jerden synyp, mıy shaıqalǵan.
